Zakir Fərəcovun rəhbəri olduğu şəhərdən şikayət – VİDEO

15:15 | 28 Mart, 2020

Sumqayıtda kanalizasiya suları küçəyə axıdılıb.

Bu barədə videogörüntülər sosial şəbəkədə yayılıb. Söhbət Sumqayıt şəhəri, 17-ci mikrorayon ərazisi, İsmət Qayıbov küçəsi, bina 29a-dan gedir. Paylaşımda vətəndaş 30 ildir bu problemlərdən əziyyət çəkdiyini qeyd edib:

“Sumqayıt şəhərində yaşayırıq. 30 ilə yaxındır zirzəmiyə yığılan suların qarşısı alınmır. Birinci mərtəbədə yaşayırıq. Ömrümüz rütubətdə, kanalizasiya iyindən boğulmaqla keçir. Nə sirrdirsə, bu boyda məhəllədə bizim binadan başqa heç birinin kanalizasiya xətti partlamır. Zirzəminin qapısı da yoxdur. Dəfələrlə qapı qoymuşuq, onu da sındırırlar.

“Azərsu”ya müraciət etmişik. Gəlib zirzəmiyə dolan suyu boşaldıblar. Amma təəssüf ki, həmin çirkli suyu pəncərənin altına töküblər. İnsanların evdən çıxmasına qadağa qoyulan bir zamanda üfunət iyindən pəncərəni açıb hava ala bilmirik”.

Sumqayıt Şəhər Su-Kanal İdarəsindən bildirilib ki, idarəyə ötən gün ərzində zirzəmiyə kanalizasiya sularının axdığı barədə şikayət daxil olmayıb. Çünki Sumqayıt Şəhər Su-Kanal İdarəsinin qəza xidmətinin əməkdaşları zəruri olan bütün avadanlıqlarla təchiz olunub. Ola bilməz ki, bənzər hadisədə kanalizasiya suyu küçəyə axıdılsın. Əgər vətəndaş bu problemlə qarşılaşıbsa, birbaşa İdarəyə müraciət etsin. Məsələ yerindəcə araşdırılsın”.

Mövzunu Facebookda şərh et