Tarix: 02:21, 2 Temmuz, 2013
SEÇİLƏNLƏR | Oxunub: 2.226

Ulu Öndərin inandığı general: Ramil Usubov

Ramil Usubov-5-big“Nə qədər ki, mən sağam, Ramil Usubovu heç kim işdən azad edə bilməz”

(Ulu Öndər Heydər Əliyev)

Bu gün Azərbaycan polisi özünün peşə bayramını qeyd edir. 1918-ci il may ayının 28-də müstəqilliyini bəyan etmiş Azərbaycan Xalq Cümhuriyyətinin milli hökumətinin tərkibində Daxili İşlər Nazirliyi yaradılıb. Prezident Heydər Əliyevin 1998-ci ilin martında imzaladığı Fərmana əsasən hər il iyulun 2-si daxili işlər orqanları əməkdaşlarının peşə bayramı kimi qeyd olunur. Dağlıq Qarabağ münaqişəsi başlandıqdan sonra Azərbaycanın müstəqilliyi və ərazi bütövlüyü uğrunda döyüşlərdə daxili işlər orqanlarının və Daxili Qoşunların şəxsi heyəti 932 şəhid verib, 681 əməkdaş isə əlil olub.

Azərbaycanda asayışın qorunması, ictimai təhlükəsizliyin təmin olunmasında Azərbaycan polisinin rolu böyükdür və bütün bu uğurlarda Daxili İşlər naziri, general-polkovnik Ramil Usubovun misilsiz xidmətləri var. 20 ilə yaxındır ölkə polisinə rəhbərlik edən Ramil Usubov Ulu Öndər Heydər Əliyevin ən çox etibar etdiyi və inandığı kadrlardan olub. Ümumilli Liderin Ramil Usubovun vəzifədən azad ediləcəyinə dair dolaşan şaiyələrə “Ramil deyirlər səni işdən azad ediblər” və ardınca “Nə qədər ki, mən sağam, Ramil Usubovu heç kim işdən azad edə bilməz” açıqlaması onun qazandığı etimadın və peşəkarlığın göstəricisidir.

Bəs kimdir Ramil Usubov? Polislərin peşə bayramı günüdə Editor.az oxucuların marağını nəzərə alaraq, Daxili İşlər naziri, general-polkovnik Ramil Usubovu keçdiyi həyat yolunu oxuculara təqdim edir:

1948-ci ildə Xocalıda dünyaya gələn Ramil Usubov 1973-cü ildə Bakı Xüsusi Orta Milis Məktəbini, 1980-ci ildə SSRİ DİN Akademiyasını bitirib. Silahlı Qüvvələrin tərkibində müddətli hərbi xidmət keçən Usubov polisə yolunu 1970-ci ildən salıb. Şuşa rayon Polis Şöbəsinin Cinayət Axtarış bölməsinin rəisi, Dağlıq Qarabağ Muxtar Vilayəti Daxili İşlər İdarəsinin rəis müavini, Əli-Bayramlı şəhər polis şöbəsinin rəisi işləyən Ramil Usubov 1987-89-cu illərdə Naxçıvan MR Daxili işlər naziri vəzifəsində çalışıb. Bundan sonra Azərbaycan Respublikası DİN-in Cinayət Axtarış İdarəsinin rəisi, Pasport İşləri, Viza və Qeydiyyat İdarəsinin rəisi, Kadrlar İdarəsinin şöbə rəisi postlarında fəaliyyətini davam etdirən polis zabiti Naxçıvan Muxtar Respublikası Ali Məclisi Sədrinin 11 avqust 1993-cü il tarixli Fərmanı ilə 2-ci dəfə Naxçıvan Muxtar Respublikasının Daxili işlər naziri təyin olunub.

8 ay sonra isə 29 aprel 1994-cü ildə Azərbaycan Respublikasının Daxili işlər naziri vəzifəsinə təyinat alan Ramil Usubov 17 ildir ki, polis orqanlarının fəaliyyətinə rəhbərlik edir. 1994-cü ildə general-mayor, 1995-ci ildə genaral-leytenant, 2002-ci ildə isə general-polkovnik rütbələri ilə təltif edilib.

“Polis Azərbaycan dövlətinin, xalqımızın keşiyində duran mübariz orqandır”. (Heydər Əliyev)

Daxili işlər naziri olduğu dönəmdə çiyinlərinə kifayət qədər ağır yük düşən Ramil Usubovun bu məsuliyyətin öhdəsindən şərəflə gəldiyini, keçid dövrü yaşayan Azərbaycanda sabitliyin qorunması işində xidmətləri xüsusilə vurğulanmalıdır. Məhz nazirin apardığı uğurlu fəaliyyət nəticəsində ölkədə cinayətkarlıq halları azalımış, mənfur qüvvələrin çirkin çevriliş planlarının qarşısının alınmasında yüksək fədakarlıq nümayiş etdirilib. Bütün bunlar ölkə rəhbərliyinin diqqətindən yayınmamış və 24 dekabr 1998-ci il tarixdə Ramil Usubov Azərbaycan Respublikasının Konstitusiya dövlət quruluşunun müdafiəsində, cinayətkarlıqla mübarizənin, ictimai təhlükəsizliyin və əmin-amanlığın təmin edilməsində, ölkədə dönməz sabitliyin əldə olunub qorunub saxlanılmasında xüsusi xidmətlərinə görə “Azərbaycan Bayrağı” ordeni ilə təltif olunub. Çoxsaylı digər mükafatlarla təltif edilən generalın rəhbərlik etdiyi qurum bu gün də öz fəaliyyətini uğurla davam etdirir.

Uğurlu fəaliyyətin olduğu, yeniliklərin tətbiq edildiyi qurumlara qarşı qısqanclıqların hər zaman olduğunu nəzərə aldıqda, dəfələrlə Daxili işlər nazirinə qarşı əssasız ittihamların, hətta iftiraların şəhidi olmuşuq. Dövlətçiliyin keşiyində şərəflə dayanan nazirin özünə yönələn müxtəlif iftiralara qarşı səbrli mövqeyi Ramil Usubovu bir çox həmkarlarlarından fərqləndirən əsas keyfiyyətlərindən biridir.

Təbii ki, Daxili İşlər nazirinə bu etimad təsadüfi deyildi və Heydər Əliyev dahinin böyük etimadını qazanması Ramil Usubovun uzun illər sərgilədiyi səmimiyyətin, etimadın, sədaqətin göstəricisi idi.

Editor.az olaraq, başda Cənab nazir Ramil Usubov olmaqla bütün polisləri peşə bayramı münasibətilə təbrik edir, onlara dövlətçiliyimizin qorunması istiqamətindəki fəaliyyətlərində daha böyük nailiyyətlər arzu edirik!

Azər Niftiyev, Editor.az