Qəzənfər Ağayev narazı vətəndaşları belə yola salır… – GİLEYbackend

Qəzənfər Ağayev narazı vətəndaşları belə yola salır… – GİLEY

  • whatsapp
  • messenger
  • telegram
  • vkontakte
  • odnoklassniki

“İsmayıl bəy onu da vurğuladı ki, Astarada iş tamamlanıb, Lerikdəki işi isə yarımçıq qalıb. Astarada 39 evə baxış keçirən mütəxəssis Astara icra başçısının birinci müavininin xahişi ilə, istisna olaraq, Baxşıyevlərin evinə də baxış keçirib və tərtib etdiyi sənəddə evin doğrudan da qəzalı vəziyyətdə olduğunu, ailənin heş bir şəraiti omayan çadırda yaşadığını qeyd edib”

Bu günlərdə “Hürriyyət”də dərc etdiyimiz “Əgər qulağınız eşitmir, gözləriniz görmür, əlləriniz tutmursa…- FHN-in məsuliyyətsiz qərarı 8 nəfərlik ailəni acınacaqlı vəziyyətdə qoyub” başlıqlı yazıda 4 ildir çadırda yaşayan 8 nəfərlik ailənin düşdüyü ağır durumdan və FHN-nin həmin ailəyə olan biganə münasibətindən söz açmışdıq.

Xatırladaq ki, 2015-ci ildə cənub bölgəsinə yağan güclü leysan yağışları nəticəsində Astara rayonunun Kijəbə qəsəbəsinin Ovala kəndində yaşayan 8 nəfərdən ibarət Baxşıyevlər ailəsinin 4 otaqlı həyət evinin divarlarında dərin çatlar əmələ gəlib, müəyyən vaxtdan sonra isə sözügedən ev ümumiyyətlə yaşayış üçün yararsız hala düşüb.

Yaranmış vəziyyətlə bağlı Fövqəladə Hallar Nazirliyinə müraciət edən ailəyə müvəqqəti olaraq 8 nəfərlik ailənin yaşaması üçün nəzərdə tutulan çadır verilib və vəd edilib ki, ən tez zamanda yaşadıqları evin bərpasına başlanacaq, evi əvvəlki vəziyyətə gətirmək mümükün olmadığı təqdirdə isə ailə üçün yeni ev inşa ediləcək.

Amma günlər, aylar keçsə də, ailə çadırdan köçürülməyib, 2018-ci ilin 23 dekabrında isə güclü küləyə tab gətirməyərək uçan çadır sadəcə yenisi ilə əvəz olunub.

Ailə üzvləri dəfələrlə Astara Rayon İcra Başçısına müraciət etsələr də, dərdlərinə əlac edən tapılmayıb, üstəlik icra başçısı Qəzənfər Ağayev onlara söyləyib ki, gedib özlərinə yeni ev tiksinlər.

Fövqəladə hallar naziri Kəmaləddin Heydərova, Nazirlər Kabinetinə, Prezident Administrasiyasına dəfələrlə müraciət edilsə də, bir nəticə olmayıb.

Fövqəladə Hallar Nazirliyindən göndərilən cavab məktubunda sadəcə evin istismar müddətinin başa çatdığı (fiziki köhnəldiyi) qeyd olunub.

Baxşıyevlər ailəsinin düşdüyü ağır durum haqda qəzetimizdə dərc olunan yazılardan sonra şikayətçi Gülbəniz Baxşıyeva bizə zəng vurub sevinclə demişdi ki, “elə indilərdə icra başçısı Qəzənfər Ağayevin tapşırığı ilə Astara rayonu İcra Hakimiyyəti başçısı yanında Fövqəladə hallar üzrə komissiyadan nümayəndələr gəlib evə baxış keçirdilər və bizə bildirdilər ki, Fövqəladə Hallar Nazirliyinə evimizin vəziyyəti ilə bağlı məlumat yollayacağıq ki, müvafiq tədbirlər görülsün”.

Gülbəyim Baxşıyevin ümid, sevinc dolu səsi bizi də ruhlandırdı. Çox ümid edirdik ki, ən tez zamanda sözügedən problem öz həllini tapacaq və cəfakeş ailə şəraitsiz çadırda yaşamaq zülmündən xilas olunacaq.

Amma ailənin də, bizim də ümidlərimiz boşa çıxdı. Belə ki, Fövqəladə Hallar Nazirliyinin Tikintidə Təhlükəsizliyə Nəzarət Dövlət Agentliyi 2019-cu ilin 23 aprel tarixində Astara rayonu Ovala kənd sakini Qiyas Ayaz oğlu Baxşıyevə (Gülbəyim Baxşiyevanın həyat yoldaşı) yolladığı məktubda “Astara rayonunda 2015-ci ilin oktyabr və noyabr aylarında yağan leysan yağışlar və 28 avqust 2018-ci il tarixdə baş vermiş yeraltı təkanların güclü təbii fəlakət törədə bilən hadisələrin təhlükəli hədd göstəricilərindən aşağı olduğundan Sizə tərəfimizdən hər hansı köməklik göstərilməsi mümkün deyil”,- deyə bildirib.

Azərbaycan Respublikası Fövqəladə Hallar Nazirliyi Tikintidə Təhlükəsizliyə Nəzarət Dövlət Agentliyinin bundan bir neçə gün sonra, aprelin 29-u “Hürriyyət”in sorğusuna yolladığı cavab da eyni məzmundadır: “Bildiririk ki, Nazirliyin Təhlükəsizliyə Nəzarət Dövlət Agentliyinin “Azərdövlətlayihə” İnstitutunun mütəxəssisləri Ovala kənd sakini Gülbəyim Baxşıyevanın fərdi yaşayış evinə vizual texniki baxış keçirmiş və 27 fevral 2018-ci il tarixdə müvafiq akt tərtib etmişlər. Baxış zamanı müəyyən edilmişdir ki, Gülbəyim Baxşıyevanın yaşayış evində yaranmış qüsurların təbii fəlakətlə əlaqəsi yoxdur. Bu səbəbdən də vətəndaşa tərəfimizdən hər hansı köməklik göstərilməsi mümkün deyil”.

Məktubda xatırlanan FHN-nin Təhlükəsizliyə Nəzarət Dövlət Agentliyinin “Azərdövlətlayihə” İnstitutunun mütəxəssislərindən biri ilə əlaqə saxladıq. Soyadını söyləməkdən imtina edən İsmayıl adlı həmin şəxsin sözlərindən məlum oldu ki, iki ay öncə Astarda 2000 yaşayış evinə baxış keçirilib. Araşdırılıb ki, neçə ev tikilib, neçəsi qalıb. Bu evlərdən 603-ü İsmayıl bəyin çalışdığı institutun payına düşüb. Yoxlama bitib, nəticələr çıxarılan məqaqmda Şamaxıda zəlzələ baş verib. Hər kəs işini kənara qoyub, hadisə yerinə getməli olub. Hazırda da bütün idarə sözügedən olayla məşğuldur.

İsmayıl bəy onu da vurğuladı ki, Astarada iş tamamlanıb, Lerikdəki işi isə yarımçıq qalıb. Astarada 39 evə baxış keçirən mütəxəssis Astara icra başçısının birinci müavininin xahişi ilə, istisna olaraq, Baxşıyevlərin evinə də baxış keçirib və tərtib etdiyi sənəddə evin doğrudan da qəzalı vəziyyətdə olduğunu, ailənin heş bir şəraiti omayan çadırda yaşadığını qeyd edib.

İsmayıl bəy qeyd etdi ki, o və həmkarları hərbi rejimdə çalışır. Onlara göstərişdən kənara çıxmaq hüququ verilmir. Bununla belə, icra başçısının sözünü yerə salmayıb, onun acınacaqlı şəraitdə yaşayan ailəyə kömək etmək təşəbbüsünü dəstəkləyib və öhdəliyində olan 39 ev əvəzinə 40 evə baxış keçirib, rəhbərliyə də bu haqda məlumat verib.

Amma Şamaxıdakı zəlzələ bütün işləri təxirə salıb, tərtib olunan aktlar ünvana çatdırılmayıb. Baxış keçirilən 603 evin aktı bu günədək təhvil verilməyib. Yalnız Şamaxıdakı iş yekunlaşanadan və mütəxəssislər Bakıya qayıdandan sonra təhvil-təslim prosesi həyata keçiriləcək.

Qiyas Baxşıyevin bizə yolladığı vatsap yazışması da İsmayıl bəyin söylədiklərini bir daha təsdiqlədi. İsmayıl bəy bizimlə söhbətdən bir gün öncə onunla vatsap vasitəsilə əlaqə saxlayan Qiyas Baxşıyevə də eyni sözləri deyib.

Yaxşı, bəs belə olan təqdirdə, FHN nəyə əsasən Astara İcra Hakimiyyətinə və “Hürriyyət” qəzetinə Baxşıyevklər ailəsinə baxış keçirildiyi və nazirliyə təqdim olunan rəyə əsasən ailəyə kömək edə bilməyəcəklərini bildirir? Axı, son baxışın nəticələri ilə bağlı nazirliyə hələ heç bir sənəd təqdim edilməyib!

“Fövqəlnazir”ə bu cür yanlış məlumat vermək kimlərin marağındadır? Çətin duruma düşən azərbaycanlı ailəsinin vəziyyətini daha da ağırlaşdırmaq kimlərə əl verir?

Göründüyü kimi, suallar çoxdur, cavablar isə hələ yoxdur. Sözügedən məsələni diqqətdə saxlayaraq baş verənlərə aydınlıq gətirməyə çalışacağıq.