Çin Xarici İşlər Nazirliyinin sözçüsü Mao Ninq bildirib ki, Çin heç bir halda Yapon militarizminin dirçəlməsinə və ya müharibədən sonrakı beynəlxalq nizama meydan oxumağa icazə verməyəcək.

“Xinhua” agentliyinin məlumatına görə, diplomat Yaponiya Özünümüdafiə Qüvvələrində rütbə sistemini yenidən nəzərdən keçirmək və imperiya dövrünün bəzi hərbi rütbələrini bərpa etmək planları ilə bağlı bir neçə Yaponiya rəsmisinin son açıqlamalarını şərh edib.
Xarici İşlər Nazirliyinin sözçüsü Potsdam Konfransının Yaponiyaya “yenidən silahlanmağı” qadağan etdiyini və ölkə konstitusiyasının pasifizm prinsiplərini və sırf müdafiə xarakterli hərbi siyasəti təsbit etdiyini xatırladıb. Agentlik onun sözlərini sitat gətirib: “Lakin son illərdə Yaponiyanın siyasətini yenidən nəzərdən keçirməsi və müdafiə büdcəsini ildən-ilə artırması, silah satışına məhdudiyyətləri yumşaltması, hücum silahları hazırlamağa çalışması və Üç Qeyri-Nüvə Prinsipindən imtina etməyi planlaşdırması narahatedicidir”.

Ümumilikdə, diplomatın sözlərinə görə, Yaponiyadakı ifrat sağçı qüvvələr pasifist konstitusiyadan kənara çıxmağa və hərbi gücünü artırmağa çalışırlar.

//Samir Qurbanov, Editor.az