ABŞ prezidenti Donald Tramp deyib ki, Tehran İslam Respublikasının nüvə proqramı ilə bağlı danışıqlara hazır olduqda İrana qarşı sanksiyaları ləğv edəcək.

Dövlət başçısı İranın “bu sanksiyalarla ayaqda qala bilməyəcəyi” səbəbindən razılığa gələcəyinə əmin olduğunu bildirib.

Editor.az xəbər verir ki, Tramp bunları Misir prezidenti Əbdülfəttah əs-Sisi ilə görüşündə deyib: “Bir anda onlar (İran hakimiyyəti) deyəcəklər: “Biz sanksiyaların ləğvini istəyirik”. “Biz bunu sülhlə başa vuracağıq”. Amerika prezidentinin sözlərinə görə, İran nüvə məsələlərini diplomatik yolla həll etməyə hazır olduğunu bildirib. O, əlavə edib ki, iyunda ABŞ-ın İranın nüvə obyektlərinə zərbələri olmasaydı, Qəzza zolağında atəşkəs mümkün olmazdı.

Xatırladaq ki, İran Aİ3 ölkələri – Fransa, Böyük Britaniya və Almaniya ilə nüvə danışıqlarının bir neçə raundu keçirib. Oktyabrın 11-də İranın xarici işlər naziri Abbas Əraqçi bəyan edib ki, Tehrana qarşı sanksiyaların bərpası ilə əlaqədar artıq danışıqlarda heç bir məna görmür. O, həmçinin bəyan edib ki, Birləşmiş Ştatlar Birgə Hərtərəfli Fəaliyyət Planından çıxmaqla danışıqlar prosesinə inamı sarsıdıb.

//Samir Qurbanov, Editor.az