ABŞ administrasiyası əsasən millətçi ultra-pravoslav yəhudilərdən ibarət Netzach Yehuda Batalyonuna, eləcə də bəzi digər İsrail Müdafiə Qüvvələrinə (IDF) və polis bölmələrinə qarşı sanksiyaları nəzərdən keçirir.

Editor.az bu barədə “The Times of Israel”e istinadla məlumat yayıb.

Qəzetin yazdığına görə, ABŞ Dövlət Departamenti bir ildən çoxdur ki, Netzach Yehuda əsgərləri və digər bölmələr, o cümlədən Fələstin əsilli ABŞ vətəndaşlarına qarşı insan haqları pozuntularını araşdırır. 2022-ci ilin dekabrında İDF fələstinlilərlə daha qarşılaşmamaq üçün batalyonu İordan çayının qərb sahilindən çıxarmaq qərarına gəlib, lakin əsgərlər və zabitlər iddia edilən cinayətlərə görə heç vaxt cavabdeh olmayıblar. Digər qəzet mənbəsi isə ABŞ sanksiyalarına görə ciddi nəticələrin gözlənilmədiyini bildirib.

Netzach Yehuda batalyonu Amerika ordusu ilə təlimlərdə iştirak edə bilməyəcək və İsrailə müttəfiq silahlarını batalyona ötürmək qadağan olunacaq. Lakin bu, İsrail komandanlığının dövlətin öz hesabına aldığı Amerika silahlarını batalyona ötürməsinə mane olmur.

//Gülnarə Abasova, Editor.az