Editor.az Amerika mənbələrinə istinadən bildirir ki, Rusiya nüvə silahlarının ən böyük və güclü arsenalına malikdir və nüvə silahı imkanlarını genişləndirməyə və modernləşdirməyə davam edir. Hesabat müəlliflərinin fikrincə, Rusiya ABŞ-ın raketdən müdafiə sistemlərindən yan keçə bilən uzaqmənzilli nüvə raketləri və sualtı çatdırılma sistemlərini təkmilləşdirməkdə davam edir.

ABŞ kəşfiyyatı da hesab edir ki, Rusiya Federasiyası həm nüvə, həm də qeyri-nüvə silahlarını daşıya bilən qeyri-strateji silahlar hazırlayır və modernləşdirir. O, bu silahlara düşmənləri çəkindirmək, “mümkün hərbi əməliyyatların artmasına nəzarət etmək və ABŞ və onun müttəfiqlərinin adi qüvvələrinə qarşı çıxmaq” vasitəsi kimi baxır. Stokholm Beynəlxalq Sülh Araşdırmaları İnstitutunun (SIPRI) məlumatına görə, Rusiya 2022-ci ilin yanvarına 1588 nüvə başlığı yerləşdirib ki, bu da ABŞ-dan (1744) azdır.

Bununla belə, ehtiyatlarla birlikdə nüvə silahlarının arsenalı Amerikanı üstələyir – 3708-ə qarşı 4477. Qeyd edək ki, Vladimir Putin fevralın 21-də Federal Məclisdə çıxışı zamanı Rusiyanın Strateji Hücum Silahlarının Sonradan Azaldılması və Məhdudlaşdırılması üzrə Tədbirlər Müqaviləsində (START) iştirakını dayandırdığını elan edib. Rusiya Xarici İşlər Nazirliyi bildirib, Moskva START müqaviləsində nəzərdə tutulan kəmiyyət məhdudiyyətlərinə əməl etməyə davam edəcək.