ABŞ prezidenti Donald Tramp köməkçilərinə Hörmüz boğazı bağlı qalsa belə, ABŞ-ın İrana qarşı hərbi kampaniyasına son qoymağa hazır olduğunu bildirib.

“Wall Street Journal”ın yazdığına görə, son günlərdə ABŞ prezidenti və müşavirləri Hörmüz boğazının açılması missiyasının münaqişəni müəyyən edilmiş dörd-altı həftəlik müddətdən kənara çıxaracağı qənaətinə gəliblər. Tramp düşünür ki, ABŞ əsas məqsədlərinə – İranın donanmasını və raket ehtiyatlarını sıradan çıxarmağa nail olmalı və aktiv hərbi əməliyyatları məhdudlaşdırmalı, eyni zamanda sərbəst ticarət axınını bərpa etmək üçün Tehrana diplomatik təzyiq göstərməlidir. Bu uğursuz olarsa, Vaşinqton Avropa və Fars körfəzindəki müttəfiqlərinin boğazın açılmasında öncülük etməsini tələb edəcək.

Trampın tez bir zamanda nəticə əldə etmək istəyinə baxmayaraq, ABŞ-ın bölgədəki hərbi mövcudluğu artır: USS Tripoli təyyarədaşıyan gəmisi və dəniz piyadaları bölmələri münaqişə zonasına daxil olub. ABŞ dövlət katibi Marko Rubio mövcud hərbi məqsədlərin bir neçə həftə ərzində tamamlanacağını, bundan sonra gəmiçilik məsələsinin “İranın özü” və ya beynəlxalq koalisiya tərəfindən həll ediləcəyini təsdiqləyib.

Ekspert icması, xüsusən də Brukinqs İnstitutu, enerji bazarının qlobal təbiəti səbəbindən ABŞ-a qaçılmaz iqtisadi ziyan vuracağını əsas gətirərək, boğaz açılmadan əvvəl əməliyyatın dayandırılması qərarını “son dərəcə məsuliyyətsiz” adlandırıb.

//Samir Qurbanov, Editor.az