Qəhvə emalı prosesindən sonra qalan çöküntüdən əldə edilən xüsusi ekstrakt bağırsaq hüceyrələrini qorumağa və iltihabı azaltmağa kömək edə bilər.

Editor.az xəbər verir ki, bu barədə Food & Function (F&F) jurnalında dərc olunan yeni araşdırmada qeyd olunub.

Alimlər siçanlar üzərində qəhvə çöküntüsünün həzm prosesini modelləşdirərək müəyyən ediblər ki, kofein və fenol birləşmələri də daxil olmaqla ekstraktın aktiv komponentləri həzm sistemindən keçdikdən sonra da qorunub saxlanılır.

Bu maddələr sərbəst radikalları (qeyri-sabit molekulları) neytrallaşdırır, oksidativ stresi azaldır və bağırsaq immun sisteminin fəaliyyətinə təsir edən əsas kimyəvi siqnallar — proinflamatuar və antiinflamatuar mediatorlar arasında tarazlıq yaradır.

Bağırsaq və immun hüceyrələri üzərində aparılan laboratoriya təcrübələri göstərib ki, bu ekstrakt iltihabı stimullaşdıran molekulların (IL-1α və IL-1β) istehsalını azaldır, eyni zamanda iltihab əleyhinə siqnalları (IL-10 və IL-1ra) artırır. Müəlliflərin fikrincə, bu təsir sağlam immun reaksiyanın qorunmasına və toxuma zədələnməsinin azalmasına kömək edir.

Etanol və superkritik CO₂ (sc-CO₂) istifadə edilərək hazırlanan ekstrakt xüsusilə effektiv olub. Onun tərkibində protokatexik turşu və kofeinin miqdarı artırılmışdır ki, bu da yüksək antioksidant aktivlik yaradır, ABTS radikallarını neytrallaşdırır və iltihab prosesində mühüm rol oynayan siklooksigenaza-2 fermentini inhibə edir.

Tədqiqatçılar bu təsiri ekstraktda mövcud olan və bir-birinin təsirini gücləndirən maddələrin kombinasiyası ilə izah edirlər. Onların qənaətinə görə, qəhvə istehsalı tullantıları bioaktiv birləşmələr baxımından dəyərli mənbə ola bilər.

//Gülnarə Abasova, Editor.az