Aktivlərinə görə Rusiyanın ilk 20 ən böyük bankı sırasında yer alan Amerika Citibank, nəhayət, ölkədəki biznesinin qalan hissəsini dayandırır.

Editor.az bildirir ki, bu barədə “The Moscow Times” xəbər verir. Citi-nin Rusiyadakı törəməsi olan Citibank noyabrın 1-dən etibarən faiz gəlirlərinin hesablanmasını və bütün əmanət və hesablama hesablarının dəstəklənməsini (açılmasını, saxlanmasını və ya xidmət göstərməsini) dayandıracaq.
Ötən il bank bütün debet kartlarını, eləcə də Rusiya Federasiyası Mərkəzi Bankının “Daha Sürətli Ödənişlər” sistemi vasitəsilə əməliyyatları, köçürmələri, terminallardan nağd pul çıxarılmasını və QR kodu ilə ödənişləri dayandırıb.

Noyabrda isə Citibank Moskvadakı sonuncu pərakəndə filialını bağlayıb.
Xatırladaq ki, “Citigroup” 2021-ci ilin əvvəlində Rusiyadakı pərakəndə biznesini satmağı planlaşdırırdı. Rusiyanın Ukraynaya genişmiqyaslı müdaxiləsindən sonra şirkət faktiki olaraq bazarı tərk etmək qərarına gəlib. 2022-ci ilin əvvəlindən bankın kreditlərinin həcmi 98%, fiziki şəxslərin əmanətlərinin və korporativ hesablarının həcmi isə 90-150 dəfə azalıb. Amerika bankı ilə yanaşı, Avropa bankları da Rusiya əməliyyatlarını məhdudlaşdırır. Məsələn, “Raiffeisen Bank” keçən avqust ayında əksər müştərilər üçün beynəlxalq köçürmələri dayandırdı.

İtaliyanın UniCredit şirkəti oktyabr ayında yeni korporativ müştərilər üçün hesabların açılmasını dayandırıb və hesab haqlarını 8-10 dəfə artırıb. Avropa Mərkəzi Bankı banklardan Rusiyadakı əməliyyatlarını kəskin şəkildə azaltmağı və bazardan tamamilə çıxmağı tələb edib.

//Samir Qurbanov, Editor.az