Almaniyanın keçmiş federal kansleri Angela Merkel ilk dəfə olaraq Rusiya-Ukrayna müharibəsi barədə danışıb. O, Ukraynaya dəstək nümayiş etdirərək Rusiyanın başlatdığı hərbi əməliyyatları “barbar müharibə” kimi qiymətləndirib.

Bu barədə Editor.az “Reuters”ə istinadən xəbər verir. Almaniya Həmkarlar İttifaqları Assosiasiyasının sədri ilə vida mərasimində çıxışı zamanı keçmiş kansler “Ukrayna ilə həmrəyliyimi bildirirəm” deyib. O, Almaniya hökumətinin “bu vəhşi müharibəyə son qoymaq” səylərini dəstəklədiyini, lakin Nazirlər Kabinetinin üzvlərinə məsləhət vermək və ya tövsiyələr vermək niyyətində olmadığını vurğulayıb.

Xanım Merkel əlavə edib ki, Rusiya rəhbərliyinin seçdiyi xarici siyasətə baxmayaraq, Qərb liderləri Vladimir Putinlə dialoqu davam etdirməlidirlər. Xatırladaq ki, Ukraynada hərbi əməliyyatlar başlayandan sonra Angela Merkel bir neçə alman rəsmisi ilə birlikdə Rusiyanın enerji layihələrini, xüsusən də “Şimal axını 2”ni dəstəklədiyi üçün açıq şəkildə tənqid edilirdi. Aprelin əvvəlində Almaniya prezidenti Frank-Valter Ştaynmayer isə Merkelin Rusiya ilə əməkdaşlığa sadiqliyini və onu “ümumi təhlükəsizlik arxitekturasına” daxil etmək cəhdini “səhv” adlandırmışdı.