“Ermənistan baş naziri Nikol Paşinyanın sülh danışıqları barədə müsbət çıxışı təbii ki, sevindirici haldır. Lakin qarşı tərəf demək olar ki, hər zaman mühüm görüşlərdən sonra sülhün bərqərar olacağı ilə bağlı açıqlamalar verdikdən sonra geri addım atıb. Bu səbəbdən də postmüharibə dövründə delimitasiya, regional kommunikasiya məsələləri hələ də həllini gözləyir. Lakin dövlətimiz üçün artıq regional kommunikasiya məsələlərində bəzi öncəlliklərdə dəyişikliklər var”.

Bu fikirləri Editor.az-a açıqlamasında Milli Məclisin deputatı Müşfiq Cəfərov deyib.

Millət vəkilinin sözlərinə görə, artıq Azərbaycan tranzit əlaqələrinin Ermənistanın iştirakı ilə baş tutacaq layihələrə marağını itirir:

“Bu, hər şeydən əvvəl erməni hakimiyyətinin münasibətlərin bərpasını və iqtisadi kommunikasiya əlaqələrinin reallaşmasını bu qədər uzatması və heç bir vədinə sadiq qalmamasından irəli gəlir. Bu gün Ermənistan regiondakı güc münasibətlərini dəyişməyə, öz mənfəətini artırmağa çalışır. Lakin onun unutduğu bir məqam var ki, hələ 2020-ci ildə razılaşdırılmış 10 noyabr bəyannaməsi mövcuddur. Əgər hər hansı bir razılıq əldə olunacaqsa, bu hər şeydən əvvəl Azərbaycan milli maraqlarını ifadə edəcək. Hərtərəfli sülh sazişinin imzalanması ilə bağlı təklifi rəsmi Bakı 2021-ci ilin fevral ayında Ermənistan tərəfinə göndərib. Azərbaycanın sülh sazişi ilə bağlı təklifi bu gün də qüvvədədir. Ona görə də bundan sonrakı addımlar daha çox Ermənistan tərəfindən atılmalıdır. Bu günə kimi sülh sazişinin əksər bəndləri tərəflər arasında razılaşdırılıb. Bundan sonra bizi gözləyən mərhələ yekun sülhə nail olmaqdır. Ermənistan nə qədər sülhü gecikdirməyə çalışsa bir o qədər özünə zərəri edəcək. Çünki Azərbaycan onu tərəfdaş kimi qəbul etdiyi layihələrdə dəyişikliklər və alternativlər əlavə edə bilər”.

//Gülnarə Abasova, Editor.az