Çarlz Perkins Mərkəzinin (Avstraliya tibb və tədqiqat mərkəzi) alimləri müəyyən ediblər ki, axşam fiziki fəaliyyət (saat 18:00-dan gecə yarısı) kök insanlarda ürək sağlamlığını qorumaq üçün digər vaxtlarda idman etməkdən daha yaxşıdır.

Editor.az xəbər verir ki, araşdırmanın nəticələri Diabetes Care jurnalında dərc olunub. Tədqiqatda 40 yaşdan yuxarı 29 836 obez yetkin iştirak edib. Könüllülər arasında təxminən üç min insana da tip 2 diabet diaqnozu qoyulub. İştirakçılar gündəlik fəaliyyətlərinin (xüsusilə aerobik məşq) çoxunu günün hansı saatında yerinə yetirdiklərindən asılı olaraq səhər, günorta və axşam məşq qruplarına bölünüblər. Tədqiqatın əvvəlində orta məlumat əldə etmək üçün alimlər xüsusi cihazlardan (bilək akselerometrləri) istifadə edərək könüllülərin fiziki aktivliyinin səviyyəsini və müddətini izləyiblər. Bundan sonra iştirakçıların təxminən səkkiz il davam edən müşahidə dövrü başlayıb. Müşahidə zamanı məlum olub ki, axşam saat 6-dan sonra qısa fasilələrlə məşq edən insanlarda (yüksək və aşağı intensiv fiziki fəaliyyətin alternativ vaxt intervalları ilə məşqlər zamanı) ürək-damar xəstəliklərinin və kəskin vəziyyətlərin inkişaf riski daha azdır.

Alimlər deyirlər ki, axşam idmanının bu əhəmiyyətli faydası 2-ci tip diabetli insanlarda insulinə həssaslığın artması ilə bağlıdır. İnsulinə yüksək həssaslıq bədən hüceyrələrinə qlükozadan daha səmərəli istifadə etməyə imkan verir ki, bu da qanda şəkərin səviyyəsini aşağı salır, qan damarlarında patoloji dəyişikliklərin qarşısını alır və ürək xəstəliklərindən qoruyur.

//Gülnarə Abasova, Editor.az