Editor.az bildirir ki, bu barədə Türkiyənin “Anadolu” xəbər agentliyi nazirin sözlərinə istinadən məlumat yayıb: “İsveç NATO-ya üzvlüklə bağlı müraciət məsələsində Türkiyənin dəstəyini almaq istəyirsə, o zaman Ankara ilə razılaşmalar üzrə öhdəliklərini yerinə yetirməlidir”.

Bozdağ NATO-nun Madriddə keçirilən son sammiti çərçivəsində Türkiyə, Finlandiya və İsveçin imzaladığı üçtərəfli Memorandumun müddəalarını xatırladıb. “Sənəd tərəflərin üzərinə müəyyən öhdəliklər qoyur, ona görə də Ankara tamamilə haqlı olaraq Stokholmdan bu vədləri yerinə yetirəcəyini gözləyir”, – nazir vurğulayıb: “Terrorçuların təxribatlarına məhəl qoymayan ölkə Şimali Atlantika Alyansına qoşulmaq yolunda Ankaradan dəstək gözləyə bilməz. Yanaşmalara yenidən baxılmalıdır”, – Türkiyənin Ədliyyə Nazirliyinin rəhbəri bildirib.

Bundan əvvəl isə Stokholmda Türkiyədə qadağan olunmuş PKK tərəfdarlarının mitinqi keçirilib. Aksiyada Türkiyə prezidenti Rəcəb Tayyib Ərdoğanın ünvanına bir sıra təhqiramiz ifadələr və jestlər edilib. Bunun ardınca İsveçin Ankaradakı səfiri Türkiyə Xarici İşlər Nazirliyinə çağırılıb və aksiya ilə bağlı ona etiraz bildirilib.

Türkiyə parlamentinin sədri Mustafa Şentop isə isveçli həmkarının Ankaraya əvvəlcədən planlaşdırılan səfərini ləğv edib və Türkiyə prezidentinin vəkili aksiya ilə bağlı Ankara Baş Prokurorluğuna ərizə ilə müraciət edib və cinayət işi başlanıb. İsveçin xarici işlər naziri Tobias Billström bildirib ki, PKK-nın Stokholmdakı hərəkətləri Ankaranın İsveçin NATO-ya daxil olması üçün müraciəti ratifikasiya etməsi prosesini çətinləşdirə bilər.