Beynəlxalq Xərçənglə Mübarizə Birliyinin idarə heyətinin üzvü və cərrah Myra Caleffi-nin sözlərinə görə, yaxın illərdə xərçəng ürək-damar xəstəliklərini geridə qoyaraq əsas ölüm səbəbinə çevriləcək.

Editor.az xəbər verir ki, onun fikrincə, xərçəng artıq dünya üzrə aparıcı ölüm səbəblərindən biri olsa da və 2030-cu ilə qədər ölüm göstəricisinin ürək-damar xəstəliklərini üstələyəcəyi proqnozlaşdırılsa da bir çox ölkələrdə bu xəstəliklə mübarizə üçün zəruri siyasi və maliyyə diqqəti yetərli deyil. Bu isə uzunmüddətli perspektivdə vəziyyəti daha da ağırlaşdırır.

Həkim bildirib ki, daha uğurlu nəticələr əldə edən ölkələrdə xərçəng müalicəsi sistemləri daha yaxşı strukturlaşdırılıb, proqramlar təşkil olunub və ixtisaslaşmış tibbi mərkəzlərin sayı daha çoxdur. Bu amillər ölüm göstəricilərinin əhəmiyyətli dərəcədə azalmasına səbəb olur.

Myra Caleffi həmçinin vurğulayıb ki, yaxın onilliklərdə xərçəngin diaqnostikası və müalicəsinə bərabər çıxışın təmin edilməsi ciddi problem olaraq qalacaq. Buna görə də, bu proqnozların təsirini azaltmaq üçün xərçəngin qarşısının alınmasına yönəlmiş strategiyaların təcili şəkildə hazırlanması vacibdir.

//Gülnarə Abasova, Editor.az