ABŞ Nümayəndələr Palatasının spikeri Mayk Conson Ukraynaya yardımın “başqa bir prioritet” olduğunu və Rusiya lideri Vladimir Putinin “marşla Avropadan keçməsinə” icazə verilməməli olduğunu söyləyib.

Editor.az bildirir ki, bu barədə o, Floridaya səfəri zamanı deyib. Conson İsraili dəstəkləmək zərurətini şərh etdikdən sonra Ukraynaya dəstəyi “başqa bir prioritet” adlandırıb. “Ukrayna başqa bir prioritetdir. Əlbəttə, biz Vladimir Putinin Avropada yürüş etməsinə icazə verə bilmərik. Və biz Ukraynaya kömək etməyin vacibliyini anlayırıq”.

Eyni zamanda, natiq “öz sərhəd siyasətimizi dəyişdirmək üçün çalışmağın” vacibliyini də vurğulayıb. O əlavə edib ki, hazırda bu məsələ ilə bağlı siyasətçilər arasında fəal danışıqlar aparılır. “Düşünürəm ki, Senatdakı həmkarlarımızın əksəriyyəti anlayır ki, bu iki şey birlikdə hərəkət etməlidir, çünki biz bunu Amerika xalqına borcluyuq. Onlar bizdən bunu istəyirlər”, – Conson deyib. Bununla belə, Conson qeyd edib ki, o, Konqresin həm İsrail, həm də Ukrayna üçün əlavə maliyyə ayıra biləcəyinə “inamlı və optimist”dir.

//Samir Qurbanov, Editor.az