Böyük Britaniya hökuməti Ukrayna üçün 650 yüngül çoxməqsədli raketdən (LMM) ibarət partiya sifariş edib.

Onlar Fransanın “Thales” hərbi-sənaye korporasiyasının zavodunda istehsal olunacaq. Britaniya Müdafiə Nazirliyinin məlumatına görə, müqavilənin məbləği 162 milyon funt sterlinq (213 milyon dollar) təşkil edir.

Tədarüklər bu gün, sentyabrın 6-da Ukraynanın müttəfiqlərinin Almaniyadakı Amerika Ramşteyn aviabazasında keçiriləcək görüşündə departamentin rəhbəri Con Healy tərəfindən rəsmi olaraq elan ediləcək. Böyük Britaniyanın artıq Ukraynaya “yüzlərlə” LMM tədarük etdiyi bildirilib. 6 km-dən çox mənzilə malik bu raketlər müxtəlif daşıyıcılardan buraxıla bilər və pilotsuz təyyarələr də daxil olmaqla, “geniş spektrli təhlükələrə” qarşı istifadə edilə bilər. Britaniya istehsalı olan yeni raketlər “Ukraynaya öz xalqını, infrastrukturunu və ərazisini qorumağa kömək edəcək”, – press-relizdə deyilir.

Avqustun 18-də Ukrayna prezidenti Vladimir Zelenski Qərb ölkələrindən elan edilən yardım paketləri çərçivəsində silah tədarükünü sürətləndirməyi xahiş edib. O, müraciətini xüsusilə ABŞ, Böyük Britaniya və Fransaya ünvanlayıb. Avqustun 23-də Amerika prezidenti Co Bayden Zelenski ilə söhbətindən sonra Kiyevə yeni hərbi yardım paketini elan edib. “Reuters” xəbər verir ki, ABŞ bu payızda Ukraynaya JASSM uzun mənzilli hava-yer raketlərini də ötürə bilər.

//Samir Qurbanov, Editor.az