Futbol üzrə Braziliya milli komandasına yeni baş məşqçi təyin olunub.
Editor.az bildirir ki, bu barədə Braziliya Futbol Konfederasiyasının (CBF) rəsmi saytında məlumat verilib. Beşqat dünya çempionlarının baş məşqçi əvəzi vəzifəsini Ramon Menezes icra edəcək. 50 yaşlı mütəxəssis bundan əvvəl Braziliyanın 20 yaşadək futbolçulardan ibarət yığmasına rəhbərlik edib.
Bu ilin fevralında Menezesin rəhbərliyi altında Selesao gənclər komandası Cənubi Amerika çempionu olub. Ramon Menezesin Braziliya millisini Mərakeş millisi ilə yoldaşlıq görüşünə hazırlayacağı bildirilir. Oyun martın 25-nə planlaşdırılıb və Braziliya millisi üçün 2023-cü ildə ilk oyun olacaq. Görüş Tanjerdə (Mərakeş) baş tutacaq. Braziliya millisi tarixdə ilk dəfə Mərakeşdə oyun keçirəcək. Xatırladaq ki, 2022-ci ildə Qətərdə keçirilən dünya çempionatından sonra Tite Braziliya millisinin baş məşqçi postunu tərk edib.
//Samir Qurbanov,Editor.az