ABŞ prezidenti Co Bayden bildirib ki, Donald Tramp prezident seçkilərində Demokratlar Partiyasının namizədi Kamala Harrisə uduzarsa, hakimiyyətin dinc yolla ötürüləcəyinə əmin deyil.

Amerika prezidenti CBS telekanalına müsahibəsində deyib ki, Donald Tramp nəyin bahasına olursa-olsun, hakimiyyət uğrunda mübarizə aparmaq niyyətindədir: “O, ciddi şəkildə danışır və bildirir ki, “uduzsaq, qan gölməçəsi olacaq, seçki oğurlanmalı olacaq” deyə Co Bayden keçmiş Amerika prezidentindən sitat gətirib. CBS xatırladır ki, Donald Tramp mart ayında Ohayoda seçki kampaniyasında çıxışı zamanı noyabrda keçirilən seçkilərdə uduzacağı təqdirdə Birləşmiş Ştatları “qan gölünə” çevirəcəyini deyib.

Xatırladaq ki, bir gün əvvəl ABŞ-ın vitse-prezidenti Kamala Harris prezident seçkilərində Demokratlar Partiyasının rəsmi namizədi olub. İyulun 21-də ABŞ-ın hazırkı prezidenti Co Bayden prezidentlik yarışından namizədliyini geri götürmək qərarını açıqlayıb.

//Samir Qurbanov, Editor.az