Polşa prezidenti Anjey Duda əmindir ki, ABŞ-ın seçilmiş rəhbəri Donald Tramp Rusiya Federasiyasına Ukraynanı məhv etməyə imkan verməyəcək.

Editor.az xəbər verir ki, o, bu barədə Varşavada NATO-nun baş katibi Mark Rutte ilə birgə mətbuat konfransı zamanı bildirib. Siyasətçi xatırladıb ki, Birləşmiş Ştatlar “nəhəng vəsaitlər, hərbi texnika və maliyyə yardımı” ilə Ukraynaya dəstək verməkdə mühüm töhfə verib.

“Bu pullara hörmət etmək onun məsuliyyətidir. Təsəvvür edə bilmirəm ki, prezident Donald Tramp Rusiyaya Ukraynanı məhv etməyə icazə verəcək. Bu, amerikalı vergi ödəyicilərinin pullarına hörmət məsələsidir”, – deyə Duda izah edib.
Onun sözlərinə görə, Amerika lideri ilə görüşündə Ukrayna haqqında danışmağı planlaşdırır. O, xüsusən də “Rusiyanın Ukraynaya təcavüzü zonasında olan” qonşu ölkələrin tərəfini çatdırmaq istəyir.

“Mən, əlbəttə ki, təkcə Ukraynanın özündəki vəziyyət kontekstində deyil, həm də Avropanın bizim hissəsindəki vəziyyəti, bizim nöqteyi-nəzərimizi, qonşularımızı, ümumiyyətlə burada baş verənləri Amerikanın maraqlarını təmsil edəcəyəm”, – deyə Polşa prezidenti bildirib. Duda əlavə edib ki, o, Trampla gözlənilən söhbət və onun siyasi qərarları ilə bağlı sakitdir. Bunların müdrik qərarlar olacağına heç bir şübhəm yoxdur”, – deyə o, yekunlaşdırıb.

//Samir Qurbanov, Editor.az