ABŞ-ın yeni seçilmiş prezidenti Donald Tramp administrasiyası dövründə hökumətin yalnız iki cinsin: kişi və qadının tanınması ilə bağlı rəsmi siyasətini davam etdirəcəyini bildirib.

Onun bəyanatı TurningPoint-in AmericaFest 2024 tədbiri zamanı verilib. Tramp həmçinin “kişiləri qadın idmanından uzaqlaşdıracağına” söz verib. Belə ki, respublikaçı transgenderlərin qadınlar arasında keçirilən idman yarışlarında iştirakı ilə bağlı mövqeyini açıqlayıb. Əvvəllər siyasətçi transgenderlərin qadın yarışmalarında iştirakını qadağan etmək niyyətində idi və rəhbərliyi “transgender dəliliyi” konsepsiyasını dəstəkləyən məktəblər üçün federal maliyyənin kəsilməsini dəstəkləmişdi.

“AP VoteCast” sorğusuna əsasən, 120,000-dən çox ABŞ sakini hökumətin transgender hüquqlarına dəstəyinin və onların ictimaiyyət tərəfindən qəbul edilməsinin həddi aşdığına inanır. Onların əksəriyyəti Donald Trampın tərəfdarlarıdır. Trampın ilk dövründə Ağ Ev “seks” anlayışını “bioloji cinsiyyət”, Co Bayden administrasiyası isə “cins kimliyi” kimi şərh edib.

//Samir Qurbanov, Editor.az