ABŞ prezidenti Donald Tramp bildirib ki, xarici liderlər onu tarifləri dayandırmağa inandırmaq üçün ona zəng edir və yaltaqlanır.

CNN-in məlumatına görə, Milli Respublikaçılar Konqresinin Komitəsinin (NRCC) Vaşinqtonda keçirilən prezident şam yeməyində o, başqa ölkələrin nümayəndələrinin razılığa gəlmək üçün hətta onun “arxasını öpməyə hazır olduğunu” deyib: “Sizə deyirəm, bu ölkələr bizə zəng edir, arxamı öpürlər. Razılığa gəlmək istəyirlər: Zəhmət olmasa, əfəndim, bir sövdələşmə edək… Mən nə lazımdırsa, edəcəm, ser” – Tramp bildirib.

Eyni zamanda, tariflərlə bağlı tənqidlərə cavab verən Tramp bildirib ki, ABŞ onlardan hər gün təxminən 2 milyard dollar qazanır. “Biz gündəlik tariflərdən demək olar ki, 2 milyard dollar qazanırıq… Və biz fərdi sövdələşmələr adlandırdığımız şeyləri etməkdə çox yaxşıyıq… Amerika tezliklə yenidən çox zəngin olacaq”, – Ağ ev lideri deyib.

//Samir Qurbanov, Editor.az