ABŞ-ın Federal Təhqiqat Bürosu, ötən həftə Donald Trampın 2024-cü ildə prezidentliyə namizədlikdən uzaqlaşdırılmasına qərar verən ştatın Ali Məhkəməsinin üzvlərinə qarşı təhdidlərlə əlaqədar Kolorado ştatının hüquq-mühafizə orqanları ilə əlaqə saxlayır.

Editor.az bildirir ki, bu barədə CNN məlumat yayıb. Büronun sözçüsü Vikki Miqoya kanala deyib: “Biz motivasiyasından asılı olmayaraq, ekstremist baxışlardan öz hərəkətlərinə haqq qazandırmaq üçün istifadə edənlərin hər hansı təhdidləri və ya zorakılıqdan istifadəsini fəal şəkildə araşdıracağıq”. Kolorado məhkəməsi hakimlərə qarşı təhdid xəbərlərini şərh etmir.

Denver Polis Departamenti bildirib ki, hüquq mühafizə orqanları dekabrın 21-i axşam saatlarında hakimin iqamətgahına “saxta kimi görünən xəbərə görə” cavab veriblər. “Təhlükəsizlik və məxfilik səbəbi ilə, eləcə də davam edən araşdırmaya görə, biz hazırda hər hansı əlavə məlumat verə bilmirik”, – CNN xidmətdən sitat gətirib.

Hesabatda deyilir ki, dövlət və yerli hüquq-mühafizə orqanları və qeyri-hökumət tədqiqat qrupları ekstremist onlayn forumlardakı ritorikanın hökumət rəsmilərinə qarşı etibarlı təhdidlərə səbəb ola biləcəyinə dair əlamətlərə nəzarət edir. “Seçkilərdən Trampa qarşı qərar çıxaran Kolorado Ali Məhkəməsinin dörd hakiminin adları tez-tez belə forumlarda onların şəxsi məlumatlarının açıqlanmasına çağıran qızışdırıcı mesajlarda, xüsusən də polis üçün nəzərdə tutulan internet yazışmalarının təhlilində görünür” – xəbərdə deyilir.

//Samir Qurbanov, Editor.az