Ukrayna-Rusiya müharibəsi davam etdikcə, beynəlxalq səviyyədə sülh təşəbbüsləri güclənir. Son olaraq Səudiyyə Ərəbistanının paytaxtı Ər-Riyadda bir sıra diplomatik görüşlər keçirilib.

Görüşlərdə Ukrayna, Rusiya, ABŞ, Çin, Hindistan və Avropa İttifaqı ölkələrinin nümayəndələri iştirak ediblər. Məqsəd, müharibənin dayandırılması və sülh prosesinin sürətləndirilməsi olub. Siyasi həll yolları, humanitar məsələlər və enerji təhlükəsizliyi görüşlərin əsas müzakirə mövzuları arasında yer alıb.

Bu arada cəbhə xəttində hərbi əməliyyatlar davam edir. Hər iki tərəf müxtəlif istiqamətlərdə mövqelərini gücləndirməyə çalışır və intensiv atışmalar baş verir.

ARB24 kanalında “Gündəm” verilişində çıxışı zamanı siyasi şərhçi Əhməd Şahidov görüşün əhəmiyyətini vurğulayıb və ABŞ-Rusiya nümayəndələrinin bir araya gəlməsinin münaqişənin diplomatik yolla həlli üçün vacib addım olduğunu qeyd edib. O, həmçinin görüşün gələcək sülh danışıqlarına təsir edəcəyini bildirib.

Hər iki tərəf konstruktiv dialoqun davam etdirilməsinə razılaşıb. Birbaşa atəşkəs barədə razılaşma əldə edilməsə də, diplomatik səylərin artırılması və müzakirələrin gələcəkdə davam etdirilməsi qərara alınıb. Beynəlxalq ictimaiyyət isə sülhə nail olmaq üçün vasitəçilik səylərini davam etdirməyə hazır olduğunu bəyan edib.