Giləmeyvə və meyvələr əsasən pəhriz məhsulları hesab olunur, lakin onların arasında kalorisi yüksək olanlar da var.

Editor.az xəbər verir ki, bu barədə SM-Clinic-in terapevti və dietoloqu Yelena Ustinova məlumat verib. O qeyd edib ki, meyvə və giləmeyvələrin kalorililiyi əsasən onların tərkibindəki karbohidratlarla müəyyən edilir, onlar nə qədər çox olarsa, bir o qədər də kalorili olur. Əksər meyvələrin 100 qramında təxminən 10 q karbohidrat var. Bununla belə, banan, üzüm, xurma və avokadonun kalorisi daha yüksəkdir. “Bunlar arasında lider 100 qramında təxminən 20 qram karbohidrat olan banandır. Bananın çəkisi (qabuğunda) təxminən 200 q olduğundan, hər meyvəyə təxminən 200 kalori düşür. Odur ki, artıq çəkisi olan və ya diabet xəstəsi olanlara bu məhsulun istehlakını məhdudlaşdırmaq tövsiyə olunur. Bir az yetişməmiş, yaşıl-sarı bananları seçmək daha yaxşıdır, çünki onların tərkibində daha az karbohidrat və daha çox lif var”, – Ustinova bildirib.

Həkimin sözlərinə görə, kalorililiyinə görə ondan sonra 100 qramında təxminən 15-20 qram karbohidrat olan üzüm gəlir. Üzümün yüksək kalorili olmasına baxmayaraq, bir çox faydalı xüsusiyyətlərə malikdir. Xüsusilə qırmızı üzüm orqanizmin sərbəst radikallarla mübarizə aparmasına kömək edən resveratrol və quercetin kimi antioksidantlarla zəngindir. “Üçüncü yerdə 100 q-da 20 q-a qədər şəkər olan xurma dayanır. Bu meyvənin tərkibində çoxlu saxaroza var, ona görə də, xüsusilə də artıq çəki və ya şəkər xəstəsisinizsə, normada istehlak edilməlidir”, – ekspert əlavə edib. Kalori miqdarında dördüncü yeri yüksək yağ konsentrasiyası ilə xarakterizə olunan avokado tutur. Dietoloqun sözlərinə görə, bu meyvənin 100 qramında təxminən 160-180 kalori var ki, bu da ilk növbədə onun yüksək yağ tərkibi ilə bağlıdır (100 q-da təxminən 14 q). Həkim qurudulmuş meyvələri də qeyd edib. O bildirib ki, meyvə və giləmeyvə quruduqda bütün maye çıxır, ona görə də onların həcmi və çəkisi azalır, lakin kalorililiyi artır. Buna görə də, hər hansı bir qurudulmuş meyvənin kalorisi təzə olanlardan qat-qat yüksəkdir və onların tərkibində daha çox şəkər var.