Ermənistan, Avropa İttifaqı və ABŞ nümayəndələri arasında yüksək səviyyəli görüş yalnız Aİ-ABŞ-Ermənistan ikitərəfli gündəliyinə aid olan məsələlərə həsr olunacaq.

Editor.az bildirir ki, bu barədə Aİ-nin xarici siyasət xidmətinin nümayəndəsi Peter Stano məlumat verib. “Görüşün “təhlükəsizlik təminatları”na həsr olunacağı doğru deyil, Aİ-ABŞ-Ermənistan ikitərəfli gündəliyindən kənar məsələlərə baxılmayacaq”, – Peter Stano deyib. O vurğulayıb ki, danışıqların əsas mövzusu respublikanın iqtisadi sabitliyi və ikitərəfli münasibətlərin inkişafı olacaq, burada Ermənistan-Azərbaycan nizamlanması müzakirə edilməyəcək.

“Aİ-nin ABŞ və Ermənistanla təşkil etdiyi yüksək səviyyəli görüş, 2023-cü ilin oktyabrında Avropa Siyasi Birliyinin Zirvə toplantısında elan edildiyi kimi, Ermənistanla əməkdaşlığımıza ciddi şəkildə ikitərəfli diqqət yetirir. ABŞ və Aİ Ermənistan və region üçün sabit, dinc, təhlükəsiz və firavan gələcək istəklərini bölüşür”, – Slovak diplomatı bildirib. O əlavə edib ki, sabit və daha möhkəm Ermənistan Cənubi Qafqazda sabitliyin yaranmasına kömək edəcək. “Bizim səylərimiz heç kimə qarşı yönəlməyib və bütün regionun və onun sabitliyinin maraqlarına uyğundur”, – Aİ Xarici Xidmət Nümayəndəsi vurğulayıb.

Xatırladaq ki, Ermənistanın baş naziri, Avropa Komissiyasının sədri və ABŞ dövlət katibinin görüşü aprelin əvvəlində Brüsseldə baş tutacaq.

//Samir Qurbanov, Editor.az