Ermənistanın ədliyyə naziri Srbuhi Qalyan yeni Konstitusiyanın mətninin hazırlanması üçün vaxt qrafiki barədə danışıb. Qalyanın sözlərinə görə, yeni mətn gələn ilin mart ayına planlaşdırılır:

“Ədliyyə Nazirliyinin mətnin hazırlanması və onun hazırlanması üçün vaxt qrafiki ilə bağlı öhdəliyini bir daha təkrarlamaq istərdim. Xüsusilə, bu öhdəlikdə Konstitusiyanın yeni mətninin mart ayında hazır olması nəzərdə tutulur.”– Srbuhi Qalyan deyib

Baş nazir Nikol Paşinyan daha əvvəl demokratik inkişaf kontekstində konstitusiya dəyişikliklərinin vacibliyini bildirmişdi. Siyasətçinin sözlərinə görə, məhkəmə sistemi ilə bağlı qanunvericilik “xalqla əlaqədən kənardadır”.
Xatırladaq ki, Ermənistanın əsas qanununun mətnində dəyişiklik edilməsi Azərbaycanın sülh müqaviləsinin imzalanması üçün qoyduğu şərtdir. Bakı dəfələrlə Ermənistan Konstitusiyasında Azərbaycana qarşı ərazi iddialarının olmamasının vacibliyini vurğulayıb.

//Samir Qurbanov, Editor.az