“2023-cü il idman ictimaiyyəti üçün də önəmli il kimi tarixə düşdü. Bu il ənənəvi idman yekunlarının Xankəndidə keçirilməsi olduqca vacib hadisədir”.

Bu sözləri Editor.az-a açıqlamasında Milli Məclisin deputatı Könül Nurullayeva deyib.

Millət vəkili bildirib ki, qalib ölkənin idmançılarının öz suverenliyimizi bərpa etdikdən sonra Xankəndidə mükafatlandırılması bütün idman ictimaiyyətini qürurlandırdı:

“Prezident İlham Əliyevin idmançılarla görüşündə söylədiyi kimi, məhz Xankəndidə ali səviyyədə mükafatlandırılma ədalət nümunəsidir. Doğrudan da bu, çox nadir nümunədir. Biz qalib xalq kimi öz dogma torpaqlarımızda bütün ənənələrimizi bərpa edirik. Xankəndidə həm idmançılar, həm azarkeşlər özlərini çox xoşbəxt hiss edirdilər. Bizim qayıdışımızla azad olunmuş ərazilərə həyat qayıdıb. Bunu cəmi 3 ay əvvəl azad olunmuş Xankındinin dirçələn simasında daha aydın görmək mümkündür.

30 il separatizmdən əziyyət çəkən Xankəndi stadionunda ilk dəfə futbol matçı keçirildi. Təbii ki, Qarabağ-MOİK qarşılaşmasının Xankəndidə keçirilməsinin rəmzi mənası var və Prezident İlham Əliyevin stadionda çıxışı zamanı bəyan etdiyi kimi, azərbaycanlıların inşa etdiyi bu gözəl diyarda 30 il ərzində separatçılar yuva salmışdılar. Faktiki bu şəhər separatizmin rəmzinə çevrilmişdi. Üç ay əvvəl Xankəndidə birgünlük antiterror əməliyyatı nəticəsində Azərbaycan öz dövlət suverenliyini tam təmin etdi. Cəmi 2 ay ərzində yenidən inşa edilən Xankəndi stadionu separatizm simvolikasından təmizləndi. Biz tarixi matçları tezliklə Ağdamın “İmarət” stadionunda da izləyə biləcəyik. Yaxın vaxtlarda stadionun yenidən inşasına başlanılacaq. Bu, işğaldan azad olunmuş ərazilərimizdə idmanın inkişafı ilə bağlı genişmiqyaslı tədbirlərin keçirildiyini göstərir. Xankəndidə keçirilən mərasim Azərbaycan idmançılarını daha böyük qələbələrə həvəsləndirir”.

//Gülnarə Abasova, Editor.az