ABŞ və İsrailin Yaxın Şərqdəki hücumları İranın hərbi imkanlarını “əhəmiyyətli dərəcədə” məhv etsə də, İran rejimi toxunulmaz olaraq qalır.
Bunu ABŞ Milli Kəşfiyyat direktoru Tulsi Qabbard 18 martda Konqresdə keçirilən dinləmə zamanı bildirib. BBC-nin məlumatına görə, Qabbard və Tramp administrasiyasının digər yüksək vəzifəli şəxsləri İrana qarşı əməliyyatın başlamasından bəri ilk açıq dinləmədə iki saatdan çox ifadə veriblər. Kəşfiyyat rəisi Demokrat senator Con Ossoffun ABŞ əməliyyatı başlamazdan əvvəl İranı qaçılmaz təhlükə hesab edib-etməməsi ilə bağlı suallarını cavablandırmaqdan imtina edib. “Nəyin qaçılmaz təhlükə olduğunu və nəyin olmadığını müəyyən edə bilən yeganə şəxs prezidentdir”, – deyə o bildirib.
17 martda Co Kent Milli Terrorla Mübarizə Mərkəzinin direktoru vəzifəsindən istefa verib və bildirib ki, İran ABŞ üçün “qaçılmaz təhlükə” yaratmır.
Medianın məlumatına görə, Mərkəzi Kəşfiyyat İdarəsinin direktoru Con Retkliff Konqresdə keçirilən dinləmə zamanı Kentlə razılaşmadığını qeyd edib. Qabbard həmçinin vurğulayıb ki, kəşfiyyat məlumatları İranın 2025-ci ilin yayında ABŞ-ın zərbələri zamanı ciddi şəkildə zədələnmiş nüvə infrastrukturunu bərpa etməyə çalışdığı qənaətinə gəlib.
Konqres üzvləri həmçinin kəşfiyyat rəsmilərinin Trampın İrana zərbə endirmək qərarında nə dərəcədə iştirak etdiyini soruşublar. Mərkəzi Kəşfiyyat İdarəsinin direktoru cavab olaraq Trampla “onlarla və onlarla” görüşdə iştirak etdiyini, lakin “qərarın verildiyi tək bir halın” olub-olmadığını bilmədiyini bildirib.
Ratkliff həmçinin əlavə edib ki, Pentaqon İranın “bölgədəki enerji obyektlərində Amerika maraqlarına” zərbə endirməsinə hazırlaşırdı və “tədbir görüb”. Qabbard öz növbəsində qeyd edib ki, ABŞ kəşfiyyat icması daha əvvəllər İranın Hörmüz boğazını bağlayacağı qənaətinə gəlmişdi.
//Samir Qurbanov, Editor.az