Yanvarın 27-də Azərbaycanın İranın paytaxtı Tehran şəhərindəki Səfirliyinə qarşı törədilmiş terror hadisəsi ilə bağlı molla rejiminin manipulyasiya cəhdləri bir-birini əvəz edir.
Hücumun qarşısını alarkən səfirliyin bir əməkdaşının şəhid olub, ikisinin yaralandığı hadisənin terror olmadığı üçün variantları artıq sınamağa başlayan Tehran, cinayətkarı sərbəst buraxmaq üçün çox absurd variantlar üzərində düşünür.
Belə ki, molla-fars rejimi indi də səfirliyə hücum edəni şizofreniya xəstəsi kimi dispanserə yerləşdirmək qərarıan gəlib. Belə olan təqdirdə haqlı suallar ortaya çıxır: O terrorçu əgər şizofren idisə o zaman niyə müsahibə alırdınız? Səfirliyə hücum edənlə arxayınlıqla müsahibə alanda xəstə deyildi, indi bu məsələ aktual oldu? Təbii ki, özünü uzun illər Azərbaycana “şiyə qardaşı” olaraq sırımağa çalışdığı bir müsəlman ölkəsinin diplomatlarına, onların ailə üzvlərinə qarşı qətl sifarişi verən belə riyakar dövlətdən bundan artığını gözləmək yersizdir.
Qəti şəkildə artıq istisna edilmir ki, bu terakt İran hakimiyyətinin xüsusi xidmət orqanları tərəfindən əvvəlcədən planlaşdırılıb. Bu zamana kimi Azərbaycanı müdaxilə etmədən görüntü yaradaraq və səsləndirilən bəyanatlarla təhdid edən, hədələyən İran molla-fars rejimi artıq Azərbaycanı real addımlarla qorxutmaq niyyətinə düşüb.
Rejimin mövcud olduğu 44 il ərzində rəsmi Tehran səfirlik və konsulluqlara terror hücumu ilə dəfələrlə yadda qalıb. Buna misal olaraq ABŞ səfirliyi, Səudiyyə Ərəbistanının konsulluğuna hücumları göstərmək olar. Azərbaycan səfirliyində törədilən terror təsdiqlədi ki, İrandakı səfirliyin, diplomatik nümayəndəliklərin toxunulmazlığına zəmanət yoxdur. Elə bunu nəzərə alan Azərbaycan molla rejiminin sabah daha hansı planları işə salmaq qərarı alacağını gözləmədən dərhal İrandakı səfirliyin fəaliyyətini tamamilə dayandırmaq barədə qərar verdi.
Çünki İran molla-fars rejimi bu teraktla artıq nümayiş etdirdi ki, münasibətləri danışıq yolu ilə həll etməkdə aciz qaldığı üçün səfirliyə qarşı terror törətmək qərarı alıb. Nəzərə alsaq ki, İran hakimiyyəti bu gün Azərbaycana qarşı nifrət fışqırtısının əsasında erməni sevdası, ermənipərəstlik və türkə nifrət motivləri əsas yeri tutur, o zaman demək ki, rəsmi Tehranda ən azı rejim dəyişməyənə kimi bu düşmənçilik mövqeyi olduğu kimi qalacaq. Belə qalacağı təqdirdə isə təbii ki, özünü haqsız duruma salmış olacaq molla rejiminin yenidən terror əməlləri ilə güc nümayişi cəhdləri istisna edilmir.
Amma zəlzələdən sonra Xoyda əziyyət çəkən vətəndaşlarının acınacaqlı, dözülməz durumuna etinasız yanaşan, soyuqdan uşaqlı-qocalı ölümə tərk edilmələri üçün fürsət yaradan, əhalinin dinc aksiyalarını sakit, dialoq yolu ilə həll etmək əvəzinə onlara SEPAH və başqa güc strukturları vasitəsi ilə hücum təşkil edən bir rejimdən istənilən riyakarlığı gözləmək olar.
Tehranda səfirliyimizə qarşı törədilmiş cinayət hadisəsi ölkələrarası siyasi və diplomatik münasibətlərin, bu sahəni tənzimləyən beynəlxalq hüquqi sənədlərin, xüsusilə də Vyana Konvensiyasının pozulması ilə yanaşı, dünya mədəniyyətinin beşiklərindən sayılan çoxmillətli, müxtəlif dinlərin nümayəndələrin yaşadığı regionda mənəvi dəyərlərə, sülhə, əmin-amanlığa qarşı atılmış növbəti çirkin addımdır.
Ancaq İran molla-fars rejiminin Azərbaycana, onun xalqına qarşı nifrəti sərhəd tanımır. Xüsusi xidmət və hüquq-mühafizə orqanlarının, o cümlədən, Daxili İşlər Nazirliyinin İranın Azərbaycan Respublikasındakı casus şəbəkəsinin, eləcə də molla rejiminin ideoloji və siyasi təxribatlarının ifadəçisi missiyasını yerinə yetirən resurslarının, onların rəhbərlərinin və təmsilçilərinin ifşası istiqamətində Azərbaycanda həyata keçirilən son əməliyyatlardan aydın olur ki, İran rejimi uzun illərdir Azərbaycanın əleyhinə böyük bir fəaliyyətə rəhbərlik edirmiş.
Azərbaycan vətəndaşlardan din adı altında pərdələnərək “istifadə edilməsi”, casusluğa, məxfi əməkdaşlığa cəlb olunması, Suriyaya göndərilməsi, dini təhsil adı ilə beyinlərinin yuyularaq öz dövlətinə, dövlətçiliyinə qarşı istifadə edildikləri ilə bağlı artıq xeyli faktlar ortadadır və bundan sonra bu cür əməllərin ifşa ediləcəyi istisnasızdır.
Əgər İran rejimi tərəfindən belə qeyri-qanuni fəaliyyətə cəlb edilmiş şəxslər mövcuddursa, onların özlərinin hüquq-mühafizə orqanlarına gəlib etiraf etmələrihəm öz həyatlarının qalan hissəsini böyük təhlükədən xilas etmiş olar, həm də xalqına, dövlətinə qarşı xainlik əməlinə xitam verərək daha ağır cəzalardan xilas olmasına vəsilə olar. Çünki bu gün İran xüsusi xidmət orqanlarına, mola rejiminin kəşfiyyatına xidmət edən, Azərbaycan xalqının, dövlətinin mənafeyinə zidd fəaliyyət göstərənlərə qarşı cəmiyyətimiz başda olmaqla Azərbaycan dövləti də güzəştsiz və barışmaz mövqe sərgiləyir.
Milli.Az