“O Globo” xəbər verir ki, Braziliyanın baş prokurorluğu keçmiş prezident Jair Bolsonaronu 2022-ci il seçkilərində məğlub olduqdan sonra dövlət çevrilişinə cəhddə ittiham edib.

İttihamlar arasında cinayətkar qrup yaratmaq və demokratik proseslərə müdaxilə də daxil olmaqla, sui-qəsddə iştirak etdiyi iddia edilən 33 nəfər də var. Baş prokuror Paulo Qonet Branko bildirib ki, ittihamnamədə demokratik təsisatlara qarşı sui-qəsd təsvir olunub. Prokurorluğun sənədlərində qeyd olunur ki, iştirakçılar Luiz İnasio Lula da Silvanın qalib gəldiyi seçkilərin nəticələrinin təsdiqlənməsinə mane olmağa çalışıblar.

Jair Bolsonaro siyasi təqibi əsas gətirərək dəfələrlə ittihamları rədd edib. Onun məğlubiyyətindən sonra minlərlə tərəfdarı prezident sarayı, parlament və Ali Məhkəmə binalarını ələ keçirib. Bu zaman keçmiş prezident ABŞ-da olub.

//Samir Qurbanov, Editor.az