Kreml hesab edir ki, ABŞ öz bazalarına edilən hücumlara cavab olaraq İran hədəflərini vurmamalıdır, çünki bu, gərginliyin daha da artmasına səbəb olacaq.

Editor.az xəbər verir ki, bu barədə Rusiya prezidentinin mətbuat katibi Dmitri Peskov brifinqdə bildirib. Rusiyanın bu vəziyyəti necə qəbul etdiyi ilə bağlı suala cavab olaraq Peskov deyib: “Biz onsuz da həddindən artıq çox olan münaqişə potensialı fonunda regionda vəziyyətin sabitliyinin pozulmasına və gərginliyin artmasına səbəb olacaq hər hansı hərəkəti alqışlamırıq”.

Kreml rəsmisinin sözlərinə görə, Rusiya rəsmiləri hesab edirlər ki, tərəflər münaqişənin daha da genişlənməsinin qarşısını almaq üçün gərginliyi azaltmaq üçün addımlar atmağa başlamalıdırlar. Yanvarın 28-nə keçən gecə İrana məxsus pilotsuz təyyarə Suriya və İordaniya sərhədində yerləşən ABŞ hərbi bazasına hücum edib.

CNN-in məlumatına görə, Vaşinqton Qəzzada müharibə başlayandan bəri regionda vəziyyətin pisləşməsi səbəbindən ilk dəfə itki verir. Politico qəzetinin yazdığı kimi, ABŞ prezidenti Co Bayden müdaxilə tədbirlərinin hazırlanmasını əmr edib. Təkliflərə İraq və Suriyada İran qoşunlarına qarşı mümkün hücum daxildir. CNN bildirib ki, Ağ Evin cavabı əvvəlki cavab zərbələrindən daha güclü ola bilər.

//Gülnarə Abasova, Editor.az