Litvada parlament seçkilərinin ikinci turunun qalibi müxalifətdə olan Sosial Demokrat Partiyası olub.

Bunu Mərkəzi Seçki Komissiyasının (MSK) saytında dərc edilmiş mandatların bölgüsünün ilkin siyahısı sübut edir. Sosial Demokratlar 141 yerdən 52-ni alacaqlar.

Dövlət Seçki Komissiyasının məlumatına görə, ikinci turda seçici fəallığı 41,3% (birinci turda – 52,06%) olub. Əvvəlki çağırış Seymdə Sosial Demokratlar 12 yerə sahib idi. Respublika qanunvericiliyinə əsasən, partiyaların heç biri çoxluq yaratmaq üçün lazım olan səsləri toplamadığından indi onlar hakim koalisiya yaratmalıdırlar. Sosial Demokratların ehtimal olunan koalisiya tərəfdaşları – “Litva adına Demokratlar”, eləcə də “Kəndlilər və Yaşıllar İttifaqı” müvafiq olaraq 14 və 8 mandat qazanıblar.

Mühafizəkar “Vətən İttifaqı – Litva Xristian Demokratları” partiyası (29 mandat) parlament seçkilərində ikinci yeri tutub. İlk üçlüyü “Zarya nad Neman” partiyası tamamlayır: onun nümayəndələri Litva parlamentində 20 yerə sahib olacaqlar.
Qeyd edək ki, Litva Seymi 141 deputatdan ibarətdir. Partiya siyahıları üzrə çoxmandatlı seçki dairəsi üzrə 70 yer uğrunda 14 partiya və bir koalisiya, birmandatlı seçki dairələri üzrə 699 namizəd 71 mandat uğrunda mübarizə aparıb.

//Samir Qurbanov, Editor.az