Martın 26-da axşam saatlarında Budapeştdə Macarıstanın baş naziri Viktor Orban və baş prokuror Peter Poltun istefası tələbi ilə nümayiş keçirilib.

Bir neçə min nəfər Baş Prokurorluğun binasından parlamentə doğru yürüş təşkil edib. Sonda nümayişçilər mərkəzi Lajos Kossuth meydanında mitinq keçiriblər.

Editor.az bildirir ki, bu barədə Macarıstanın “Nepszava” portalı məlumat yayıb. Aksiyanı keçmiş hökumət rəsmisi Peter Magyar təklif edib. O, açıq şəkildə Macarıstan hakimiyyətini sistemli korrupsiyada ittiham edib. Bundan əvvəl Peter Magyar keçmiş ədliyyə naziri və onun keçmiş həyat yoldaşı Judit Varqa ilə söhbətin səs yazısını dərc etmişdi. Audioyazıda Judit Varqa baş nazir Antal Roqanın köməkçilərinin Volner-Schadl işi üzrə sübutların bir hissəsini məhv etmək cəhdindən danışır.

Onun əsas müttəhimi 2022-ci ildə məhkəmə icraçıları xidmətinin keçmiş rəhbəri Gergi Sadldan rüşvət almaqda ittiham olunan Ədliyyə Nazirliyinin keçmiş dövlət katibi Pal Volnerdir. Peter Magyarın dediyinə görə, bu söhbət həyat yoldaşından bir daha istefa verməsini istədikdə qeydə alınıb və o, sadəcə mafiya hökumətindən ayrıla bilməyəcəyini söyləyib. Çərşənbə axşamı Magyar bu iş üzrə şahid qismində prokurorluqda ifadə verib. O, Viktor Orban hökumətinə qarşı partiya yaratmaq niyyətini də açıqlayıb.

Xatırladaq ki, Judit Varqa 2023-cü ilin iyununda istefa verib. O, ölkə prezidenti Katalin Novakla birlikdə pedofiliyaya görə məhkum edilmiş şəxsin əfv olunması ilə bağlı qalmaqala görə istefa verdiyini açıqlayıb.

//Samir Qurbanov, Editor.az