Rusiya Təhlükəsizlik Şurasının sədr müavini Dmitri Medvedev bildirib ki, ABŞ-ın Aİ ixracına tətbiq etdiyi “qarşılıqlı” gömrük rüsumları blokun iqtisadiyyatını məhv edir.

Editor.az bu barədə xarici mediaya istinadla xəbər verir.

ABŞ prezidenti Donald Tramp Amerikanın ticarət balansını yaxşılaşdırmaq üçün hərtərəfli gömrük tarifləri elan edib. Tramp ABŞ-ın iqtisadi tərəfdaşlarını proteksionist siyasət və valyuta manipulyasiyası yolu ilə istehlak bazarına çıxış imkanlarından istifadə etməkdə ittiham etmişdi.

Medvedev açıqlamasında bildirib ki, bu addım qlobal ticarəti ciddi şəkildə pozsa da, ABŞ-la demək olar ki, heç bir ticarəti olmadığı üçün Rusiyaya çox da təsir etməyəcək.
Medvedev sosial şəbəkədəki paylaşımında deyib: “Diz çökərək reaksiya verməyə ehtiyac yoxdur. Sahildə oturub düşmənin cəsədinin üzüb keçməsini gözləməliyik. Trampın tarifləri Aİ iqtisadiyyatını “çürümüş cəsəd”ə çevirəcək”.

//Gülnarə Abasova, Editor.az