Bişkekdə Rusiya səfiri Sergey Vakunova Qırğızıstan vətəndaşlarının Moskvada kütləvi saxlanması ilə bağlı rəsmi nota təqdim edilib. Qırğızıstan Xarici İşlər Nazirliyi təhlükəsizlik qüvvələrinin aprelin 11-də “Bodrost” hamam kompleksində törətdikləri hərəkətlərin araşdırılmasını tələb edib.

“Rusiya tərəfinə hüquq-mühafizə orqanları tərəfindən həyata keçirilən əməliyyatın, habelə vətəndaşlara qarşı güc tətbiqinin əsasları barədə məlumatların təqdim edilməsi və güc tətbiqi əsassızdırsa, bu hadisə ilə bağlı Moskva şəhərinin hüquq-mühafizə orqanlarının nümayəndələrinə qarşı müvafiq tədbirlərin görülməsi xahişi ilə rəsmi nota verilib”, – deyə XİN-dən bildirilib.

Xatırladaq ki, aprelin 11-də Moskvanın “Bodrost” hamamında əksəriyyəti Qırğızıstandan olan onlarla miqrant saxlanılıb. Reyd zamanı yayılan görüntülərdə təhlükəsizlik qüvvələrinin kişiləri üzüstə uzanmağa, təpikləməyə və diz çökməyə məcbur etdiyi görünür. Telegram kanalı Readovka yazıb ki, qeyri-qanuni miqrantlar rusları içəri buraxmaqdan imtina edərək “hamamı zəbt ediblər”. Kanalın məlumatına görə, 40-a yaxın adam saxlanılıb, bir neçəsinə isə Rusiya Federasiyasının İnzibati Xətalar Məcəlləsinin 18.8 (giriş və qalma qaydalarının pozulması) maddəsi ilə ittiham irəli sürülüb. Onların müdirinin də eyni maddə ilə araşdırıldığı iddia edilir.
Qırğızıstan parlamentinin deputatı Janar Akayev çevik qüvvələrin Moskvada qırğız iş adamının hamamına soxulmasından qəzəblənib. O, Rusiya hüquq-mühafizə orqanlarını “sadəcə öz işi ilə məşğul olan və dinc həyat sürən insanlara qarşı bu cür barbar hərəkətlər və zorakılıq edənləri” məsuliyyətə cəlb etməyə çağırıb. “Çəkilən bütün xərclər ödənilməli və üzr istənilməlidir!” — deyə o, Facebook-da yazıb.

//Samir Qurbanov, Editor.az