Ağ Ev Bakı ilə İrəvan arasında dialoqda vasitəçi rolunda çıxış etmək niyyətində deyil və Ermənistan-Azərbaycan münaqişəsinin nizamlanması məsələsində Moskva ilə rəqabət aparmaq istəmir.
Editor.az xəbər verir ki, bu barədə ABŞ Dövlət Departamentinin sözçüsü Ned Prays bildirib. Onun sözlərinə görə, bu gün ABŞ Azərbaycan və Ermənistanın tərəfdaşıdır, lakin sülh prosesində vasitəçi deyil.
O vurğulayıb ki, buna görə də Vaşinqton vasitəçiliklə bağlı digər təkliflərə qarşı çıxmaq niyyətində deyil: “Düşünürəm ki, biz həm sözdə, həm də əməldə iki ölkə ilə münasibətlərimizin xarakterini, iki ölkəni bir araya gətirməyə qadir olduğumuzu, Ermənistan və Azərbaycan arasında münasibətlərdə əlavə irəliləyiş əldə etməyə kömək etməyə hazır olduğumuzu nümayiş etdirmişik”, – Prays bildirib.
Dövlət Departamentinin nümayəndəsi bildirib ki, bu, Rusiya ilə rəqabət naminə deyil, regionda fikir ayrılıqlarının tam həlli üçün edilib. Sonda o əlavə edib ki, bu gün Vaşinqton, eləcə də Bakı və İrəvan Cənubi Qafqazda sülh və təhlükəsizlikdə maraqlıdır.
//Samir Qurbanov,Editor.az