ABŞ prezidenti Co Bayden oğlu Hunteri əfv etmək qərarını açıqlayıb. Amerika prezidentinin bəyanatını Ağ Evin mətbuat xidməti yayıb.

Əfv həm Hunter Baydenin mümkün məhkumluğunu, həm də potensial günahını etirafını əhatə edəcək. Əvvəllər Amerika dövlətinin başçısı dəfələrlə belə bir ehtimalı istisna etmişdi.

Kiçik Bayden silah pozuntusu və vergidən yayınma hallarında əfv edilib. Birinci iş üzrə hökm dekabrın 12-də, ikinci iş üzrə isə dekabrın 16-da gözlənilirdi. Co Bayden, bu işdə ABŞ Ədliyyə Nazirliyinin işinə təsir etməyəcəyinə dair vədinə əməl etdiyini, həmçinin amerikalıların “ata və prezidentin niyə belə bir addım atdığını anlayacaqlarına” ümid etdiyini bildirib. Ağ Ev rəhbərinin sözlərinə görə, oğluna qarşı irəli sürülən ittihamlar siyasi motivlidir. O, bunları onu “sındırmaq” cəhdləri kimi təsvir edib. Co Bayden əlavə edib ki, oğlunu əfv etmək qərarını çox düşündükdən sonra verib və bunun təkcə qohumluq əlaqələri deyil, həm də məhkəmənin ədalətsiz olduğuna inanması ilə müəyyən edib. “Mən ədalətə inanıram, amma ona da inanıram ki, siyasət bu prosesə nüfuz edib və ədalətin pozulmasına gətirib çıxarıb”, – ABŞ prezidenti deyib.

//Samir Qurbanov, Editor.az