ABŞ prezidenti Donald Tramp Ukrayna prezidenti Vladimir Zelenski və digər Avropa liderləri ilə söhbəti zamanı deyib ki, Rusiya və Ukrayna münaqişənin həllini özləri tapmalı olacaqlar.

Editor.az bildirir ki, bu barədə “New York Times” altı mənbəyə istinadən məlumat yayıb. Nəşrin mənbələrinə görə, Tramp da Rusiyaya qarşı yeni sanksiyalara qoşulmaq üçün “öz təhdidlərindən” geri çəkilib. Avropa rəsmiləri hesab edirlər ki, onlar Vaşinqtonun tezliklə Moskvaya qarşı yeni məhdudiyyətlər qoymağa qərar verəcəyini gözləməməlidirlər.
Donald Trampın Avropa nümayəndələri ilə söhbəti Rusiya prezidenti Vladimir Putinlə telefon danışıqlarından sonra baş tutub. Söhbət iki saatdan çox davam edib.

Tərəflər Ukraynadakı münaqişənin həlli yollarını, eləcə də ticarət perspektivlərini müzakirə ediblər. Prezidentlər Rusiya və Ukrayna tərəflərinin nümayəndələri arasında “ən yüksək səviyyədə” mümkün təmaslar mövzusuna da toxunublar.

//Samir Qurbanov, Editor.az