“Ukraynaya ABŞ istehsalı olan “Patriot” raketlərinin verilməsi uzun zamandır ki, müzakirə olunurdu. Ukrayna prezidenti Volodimir Zelenski və Co Baydenlə görüşündə də bu məsələ əsas müzakirə obyektinə çevrilib”.

Bu fikirləri Editor.az-a açıqlamasında politoloq İlyas Hüseynov bildirib.

Onun sözlərinə görə, Ukraynanın hava hücumundan müdafiə sistemini gücləndirilməsi bugün Rəsmi Kiyev üçün mühüm prioritet təşkil edir:

“Çünki Rusiya da İran istehsalı olan hava hücumundan müdafiə sistemini yarmaq elementlərini özündə əks etdirən PUA-ların alınması ilə bağlı addımlar atır. Bir gecə ərzində Ukraynanın bütün şəhərləri İran PUA-ları tərəfindən hücuma məruz qaldı. “Patriot” raketləri də xüsusi əhəmiyyət kəsb edə bilər. Bu raketlərin texniki üstünlükləri çox genişdir. Türkiyə də “Patriot” raketlərinin alınması ilə bağlı ABŞ-a müraciət etsə də müsbət cavab almadı. Türkiyə də məcburiyyət qarşısında qalıb Rusiya istehsalı olan “S-400″ raketlərinin tədarükünü həyata keçirtdi”.

Politoloqun fikrincə, “Patriot” raketləri Rusiya-Ukrayna müharibəsinə də əhəmiyyətli dərəcədə təsir göstərəcək:

“Bu, Rusiyanın hücumlarını qabaqlamaq məqsədi daşıyır. Eyni zamanda, ABŞ-da qlobal silah bazarında öz üstünlüklərini nümayiş etdirməyə çalışır. Müharibələr gələcəkdə  silah biznesinə və istehsalçı ölkələrə diqqəti artırır. Ukraynaya siyasi, texniki dəstəyin gücləndirilməsi məqsədi daşıyan yardım paketidir. Bu raketlər zenit-raket kompleksi seqmentində öz yeri ilə seçilir və Ukrayna ordusunun hava hücumundan müdafiə sisteminin daha da sabit şəkildə qorunmasına xidmət edəcək”.

//Safura Bənnayeva, Editor.az