Polşa prezidenti Anjey Duda bildirib ki, Ukraynada sülh razılaşmasına nail olmaq üçün hər iki tərəf güzəştə getməlidir.

“Euronews” telekanalına müsahibəsində o qeyd edib ki, heç bir tərəf özünü qalib hesab etməməlidir və sülh müqaviləsi kompromis və çox güman ki, uzunmüddətli olacaq. “Ukrayna da müəyyən dərəcədə təslim olmağa məcburdur və çox güman ki, belə olacaq. Nə dərəcədə? “İndiki mərhələdə bunu demək mənim üçün çətindir” – deyən Duda vurğulayıb ki, yalnız belə qarşılıqlı geri çəkilmə davamlı sülhə gətirib çıxara bilər. Eyni zamanda, o, münaqişənin həllində ABŞ və onun prezidenti Donald Trampın əsas rolunu vurğulayıb.

Xatırladaq ki, bir gün əvvəl, aprelin 23-də Londonda ABŞ, Avropa ölkələri və Ukrayna nümayəndə heyətlərinin görüşü olmalı idi. Lakin danışıqlardan bir gün əvvəl dövlət katibi Marko Rubio və prezidentin xüsusi nümayəndəsi Stiv Vitkoff Londona səfərlərini ləğv ediblər. Onların nümunəsini Fransa, Almaniya və Böyük Britaniyanın xarici işlər nazirləri izlədilər. Ona görə də görüş ekspertlər səviyyəsində baş tutub. Danışıqlar başlamazdan əvvəl Ukrayna hakimiyyəti Krımdan imtina etmək imkanını açıq şəkildə rədd etdi. Buna ABŞ prezidenti cavab verib ki, bu, sülh danışıqlarına zərbə vurub.

//Samir Qurbanov, Editor.az