Rusiya televiziyası Ukrayna ilə bağlı yeni saxtakarlıqla gündəmə gəlib. Bu dəfə studiyadakı “mütəxəssislər” taktiki nüvə silahlarının Kiyevə ötürüldüyünü bildiriblər.

“Newsweek”in məlumatına görə, bu əsassız fərziyyəni Kreml yönümlü Siyasi İnformasiya Mərkəzinin rəhbəri Aleksey Muxin “Rossiya-1” dövlət telekanalının efirində bildirib. Onun sözlərinə görə, F-16 qırıcılarının Ukraynaya çatdırılması taktiki nüvə silahlarının da ötürüldüyündən xəbər verir: “Birincisi, F-16-lar artıq mövcuddur və mən əminəm ki, taktiki nüvə silahları artıq mövcuddur”, – Muxin deyib.

Lakin Qərbin ukraynalılara nüvə silahı göndərdiyinə dair heç bir sübut yoxdur. Ukrayna Budapeşt Memorandumu çərçivəsində Rusiya və ABŞ-ın təhlükəsizlik zəmanəti müqabilində nüvə arsenalından imtina edib. Buna baxmayaraq, Kremlyönlü media və rəsmilər 2022-ci ilin fevralında Rusiyanın işğalı başlayandan bəri dəfələrlə nüvə silahı haqqında xəbərlər yayıblar.

//Samir Qurbanov, Editor.az