İsrailin müdafiə naziri İsrael Katz İsrail Müdafiə Qüvvələrinə (IDF) ABŞ prezidenti Donald Trampın təklifinə uyğun olaraq Qəzza sakinlərinin ölkədən çıxması variantlarını ehtiva edən plan hazırlamağı tapşırıb.

İsrail hərbi idarəsinin rəhbərinin sözlərinə görə, yəhudi dövlətini anklavdakı əməliyyata görə tənqid edən ölkələr fələstinliləri öz ərazilərində qəbul etməyə borcludurlar.

İsrail Katz “bütün dünyada tətbiq edildiyi kimi, Qəzzalılara çıxış və mühacirət azadlığı verilməlidir” deyib. “HƏMAS Qəzza xalqından canlı qalxan kimi istifadə edib və ölkənin mərkəzində terror infrastrukturu qurub və indi də onları girov saxlayır, onlardan pul tələb edir, humanitar yardımdan istifadə edir və Qəzzanı tərk etmələrinə icazə vermir”, – o əlavə edib. Qəzza zolağının sakinlərinin “onları qəbul etməyə razı olan istənilən ölkəyə mühacirət edə” biləcəyi güman edilir. İsrail Katz potensial istiqamətlər arasında İsrailin anklavdakı hərəkətləri ilə bağlı “yalan ittihamlar” edən İspaniya, İrlandiya və Norveçi qeyd edib. İDF-nin hazırlayacağı plana quru keçidləri ilə çıxış və dəniz və hava ilə səyahət üçün “xüsusi şərtlər” daxil edilməlidir.

Xatırladaq ki, Donald Tramp İsrailin baş naziri Benyamin Netanyahu ilə görüşdən sonra Qəzza zolağının Vaşinqtonun nəzarətinə keçəcəyini və bu bölgənin “iqtisadi inkişafına” diqqət yetirəcəyini bildirib. ABŞ prezidenti həmçinin fələstinlilərin başqa ölkələrə köçürülməsinin tərəfdarıdır. İdeya BMT, Səudiyyə Ərəbistanı və Avropa ölkələri tərəfindən tənqid edilib. İsrail Xarici İşlər Nazirliyi tənqidlərə cavab olaraq Qəzzanı “uğursuz sınaq” adlandırıb.

//Samir Qurbanov, Editor.az