Rusiyadakı müsəlmanların mərkəzləşmiş təşkilatları müsəlmanların müqəddəs kitabı Qurani-Kərimin yandırılmasını pisləyib və belə bir hərəkətin dünya müsəlmanlarına qarşı küfr və təhqir olduğunu bəyan ediblər.
Rusiya Regionlarındakı Müsəlmanların Koordinasiya Mərkəzinin birgə bəyanatında bunun Avropadakı “şeytani hərəkətlərin” növbəti nümunəsi olduğu qeyd edilir: “İsveçin paytaxtında Qurani-Kərimin açıq şəkildə yandırılması Avropa cəmiyyətinin dərin tənəzzülündən xəbər verir. Söz və dini etiqad azadlığının təzahürü kimi təqdim olunanlar bəşəriyyətin mənəvi dəyərlərinin vəhşicəsinə pozulmasından başqa bir şey deyil”, – bəyanatda deyilir.
Rusiya müftilərinin sözlərinə görə, Qərb dövlətləri irqçilik, ksenofobiya və islamofobiyanı ört-basdır etmək üçün söz azadlığı və liberal dəyərlərin qorunması şüarlarını təbliğ edirlər. “Mənəvi və əxlaqi dəyərlərin çürüməsi, o cümlədən əxlaqsızlığın yetişdirilməsi,… ənənəvi ailə dəyərlərinin inkarı, eynicinsli nikahların və digər iyrəncliklərin təbliği Qərb üçün adi hala çevrilib”, – mesajda deyilir. “Biz həqiqətən ümid edirik ki, Avropa bu əxlaqsız və təxribatçı təzahürlərə son qoyacaq.
Bunun onlar üçün sonu yaxşı olmayacaq”, – deyə təşkilat əlavə edib. Qeyd edək ki, ynvarın 21-də ifrat sağçı siyasətçi Rasmus Paludan Türkiyənin Stokholmdakı səfirliyi qarşısında etiraz aksiyası keçirərək, İslamı pisləyib və Quranı yandırıb. Ankara bu hərəkəti “qanuni” adlandıran İsveç hakimiyyətinin mövqeyini kəskin şəkildə pisləyib. Buna cavab olaraq Türkiyə prezidenti Rəcəb Tayyib Ərdoğan İsveçin NATO-ya üzv olmaq istəyini dəstəkləməkdən imtina edib.
//Samir Qurbanov, Editor.az