Ukraynada hərbi əməliyyatın başlaması və yeni sanksiyalar dalğası Rusiyada antidepressant preparatlara tələbatın kəskin artmasına səbəb olub. Fevralın 28-dən martın 6-dək apteklərdə bu dərmanların ümumi satışı 525 milyon rublu ötüb ki, bu da bir il əvvəlki göstəricidən dörd dəfədən də çoxdur. Xəstələr qıtlıq qorxusu və qiymətlərin artması fonunda dərman ehtiyatı yığırlar ki, bu da bəzi apteklərdə loqistika ilə bağlı pozuntular fonunda antidepressant və sedativ dərmanların çatışmazlığına səbəb olub.

Editor.az-ın “Kommersant”a istinadən verdiyi məlumata görə, fevralın 28-dən martın 6-dək olan bir həftə ərzində Rusiya apteklərində 525,6 milyon rubl dəyərində 577,6 min bağlama antidepressant satılıb. Göstəricilər əvvəlki ilin eyni səviyyəsini müvafiq olaraq 3 və 4,4 dəfə üstələyib. Antidepressantlara tələbat digər dərmanlardan daha yüksəkdir. “DSM Qrup”un məlumatına görə, həftə ərzində apteklərdə ümumi dərman satışı vahidlər üzrə 50,3%, pul dəyərində isə 123,9% artıb.