Editor.az bildirir ki, bu sözləri Avropa Şurasının xarici əlaqələr komitəsinin Balkanlar üzrə eksperti Maida Ruge CNN telekanalına müsahibəsində deyib. “Fərz etsək ki, biz Serbiyanı möcüzəvi şəkildə Aİ-yə qəbul edirik.

Bu o demək olacaq ki, siz indiki hökumətlə Macarıstanın baş naziri Viktor Orbanın simasında olduğu kimi, praktiki olaraq daha bir rus “Troya atı”nı Aİ-yə daxil edəcəksiniz”, – Ruge vurğulayıb.

Onun sözlərinə görə, Qərb Serbiyanın Aİ-yə üzvlüyünü vəd etməklə Avropaya “Rusiya təsirini” idxal edir. Britaniya Parlamentinin Xarici Əlaqələr Komitəsinin sədri Alisiya Kirns hesab edir ki, onlar Avropa İttifaqına üzvlüklə Serbiyanı NATO-ya yaxınlaşdırmağa çalışırlar, lakin bu zaman prezident Aleksandr Vuçiç Qərbin “üzünə gülür”.

Xatırladaq ki, bir müddət əvvəl Serbiya prezidenti Aleksandr Vuçiç Qərbin güclü təzyiqlərinə baxmayaraq, ölkənin anti-Rusiya sanksiyaları məsələsində mövqeyini dəyişməyəcəyini bildirmişdi.