Alimlər müəyyən ediblər ki, çöldəki temperatur 20°C-dən aşağı düşəndə ​​arıqlamaq motivasiyası zəifləyir.

Editor.az xəbər verir ki, tədqiqatın nəticələri Journal of Environmental Economics and Management (JEMM) jurnalında dərc olunub.

Tədqiqatçılar Davranış Risk Faktorlarına Nəzarət Sistemi adlı uzunmüddətli sağlamlıq sorğusunun məlumatlarından istifadə ediblər. Buraya 1991-2010-cu illər arasında ABŞ-da edilən milyonlarla telefon zəngləri daxildir. Qeyri-mövsümi hava şəraitinin çəkiyə nəzarət davranışına təsirini qiymətləndirmək üçün respondentlərin cavabları sorğu günü yerli gündüz temperaturları ilə müqayisə edilib.

Məlum olub ki, 20°C-dən aşağı temperaturda böyüklər pəhriz saxlamaq və fiziki aktivliyi artırmaq kimi üsullarla arıqlamağa daha az cəhd edirlər. Amma isti havalarda, xüsusən də termometr 25°C-dən yuxarı qalxdıqda, iştirakçılar daha sağlam həyat tərzi keçirməyə çalışırlar: onlar daha çox idman edir və pəhrizlərində meyvə və tərəvəzlərin nisbətini artırırlar.

Araşdırmanın həmmüəllifi Brandin F. Churchill deyir: “Biz davranışın havadan nə qədər asılı olduğuna təəccübləndik. Ən soyuq gündən ən isti günə keçmək davranışda təxminən 7% dəyişikliklə nəticələnib”.

//Gülnarə Abasova, Editor.az