2040-cı il hədəflərinə Rusiya tərəfindən göstərilən bir reaksiya olduğunu düşünürəm. Ümumilikdə isə istər Qarabağda, istərsə də sərhəddə baş verənlərdən Rusiya xəbərdardır. Sadəcə, buna göz yumurlar”.
Bu fikirləri Publika.az-a Türkiyənin Azərbaycandakı Səfirliyinin keçmiş hərbi attaşesi, istefada olan general-mayor Yücel Karauz ermənilərin dövlət sərhədində və Qarabağda vəziyyəti gərginləşdirmək üçün törətdikləri təxribatlarından danışarkən deyib.
General bildirib ki, Ermənistan dövləti yarandığı gündən və Qafqaza yerləşdikləri 200 ildən bəri başqaları tərəfindən həm idarə, həm də istifadə olunub: “Onlar 1918-ci ildən etibarən yaradılan dövlət strukturu içərisində də başqalarının siyasi hədəflərinin əlaltısı olublar. Birinci Qarabağ savaşı təkcə Ermənistanla Azərbaycan arasında həyata keçirilən bir müharibə deyil, həm də ermənipərəst güclər, onların silahlı qüvvə və texnikaları ilə aparılıb. 28 ildə ATƏT-in Minsk qrupu adlı işə yaramaz mexanizm çərçivəsində Azərbaycanın haqqı və hüquqları əngəlləndi. 44 günlük Vətən müharibəsi ilə Azərbaycanın öz tarixi torpaqlarını erməni işğalından azad etməsi isə yeni bir reallıq yaratdı. Bu zəfərin bu qədər qısa müddətdə əldə olunması gözlənilən bir şey deyildi. Ancaq Azərbaycan dövləti, lideri, xalqı və Müzəffər Ordusu 44 günlük qısa müddətdə ərazilərini işğaldan azad etməyi bacardı. İmperialist, ermənipərəst qüvvələr, erməni diasporu və Ermənistanın daxilində maraqları alt-üst olan Xocalının əliqanlı qatilləri yeni duruma alışa bilməyiblər. Buna görə də bölgəyə sülhün və sabitliyin gəlməsini istəmirlər. Həmçinin Azərbaycan, Türkiyə və Ermənistanın özlərindən asılı, sözlərindən çıxmayacaq bir şəkildə yaşamalarını istəyirlər. Ancaq Azərbaycan dövləti başqalarının sözü ilə və maraqlarına uyğun şəkildə hərəkət edən dövlət olmadığını illərdən bəri nümayiş etdirib. Qarabağ zəfərindən sonra isə yeni reallıq çərçivəsində öz ərazi bütövlüyü, haqq və hüquqları ilə milli maraqlarını həyata keçirməkdədir”.
Y.Karauzun sözlərinə görə, həmin qüvvələr Rusiyada baş tutacaq zirvə görüşündən, Nikol Paşinyan və erməni xalqı sülh, sabitlik, Zəngəzur dəhlizinin açılmasından, Azərbaycan və Türkiyə ilə atəşkəs anlaşmasının sülh razılaşmasına doğru getməsindən də narahatdırlar: “Azərbaycanın yürütdüyü siyasət, İstanbulda Türk Dövlətləri Təşkilatının VIII Zirvə görüşünün baş tutması, 2040-cı il hədəfləri, 2022-2026 hədəfləri yönündə hər sahədə ortaq əməkdaşlıq, əzm və qətiyyətliliyin fonunda bunun bir reaksiya olaraq əlaltılarından, Qarabağ klanı və bu klanın ordu içərisindəki adamlarından istifadə edərək təxribat törədirlər. Azərbaycan dövlətinə, əsgərinə və ərazisinə qarşı istər sərhəddə, istərsə də Qarabağda həyata keçirilən fəaliyyətlərə misli ilə qarşılıq verməlidir. Bir mərmi atılıbsa, 10 mərmi atmalıdır. Rəsmi Bakının qərarlılığını və gücünü göstərməsi lazımdır ki, bu da hazırda edilir. İkincisi, 10 noyabr razılaşması çərçivəsində müəyyən bir planda olan məsələlərlə bağlı nəzarət gücləndirilməli, qabaqlayıcı diplomatiya və hərbi tədbirlərin sayı artırılmalıdır”.
General hesab edir ki, bu təxribatlar törədilməyə davam edəcəyi təqdirdə, Azərbaycan Laçın dəhlizini bağlamalıdır: “Ancaq mən düşünmürəm ki, baş verənlər bu nöqtəyə qədər gedib çıxacaq. Bölgəyə sülhün və sabitliyin gəlməsini istəməyən qüvvələr burada yeni bir savaş və konflikt ocağı yaratmaq istəyirlər, buna cəhd edirlər. Bu oyuna düşmədən, haqq və hüquqlarımızı qoruyacaq şəkildə hərbi, idarəçilik diplomatik tədbirlərlə prosesin həyata keçirilməsi, təmkinli olunması, haqdan və beynəlxalq hüquqdan çıxış edilməsi, milli birlik içərisində səbrli şəkildə olayları yönəltmək lazımdır”.
Karauz vurğulayıb ki, Rusiyanın Qarabağdakı proseslərdən xəbərsiz olması mümkünsüzdür: “Onlar sadəcə göz yumurlar. Bu da Rusiyanın səmimiyyətdən bir qədər uzaq durduğunu, ikili standartlardan irəli gələn siyasət yürütdüyünü göstərir. Son hadisələrin Türk Dövlətləri Təşkilatının 2040-cı il hədəflərinə Rusiya tərəfindən göstərilən bir reaksiya olduğunu düşünürəm. Bir tərəfdən də Qarabağda heykəl qoymaqda, məktəb və xəstəxana açmaqda, hərbi bazalarını daimi kimi və mövcud sülhməramlıların sayından artıq bir şəkildə genişləndirməklə sülh adına, atəşkəsə nəzarət və müvəqqəti olan bir ünsürə yaraşmayan mövqe sərgiləyir”.