Türkiyə Böyük Millət Məclisinin (TBMM) Ədalət Komissiyasının sədri Cüneyt Yüksel bildirib ki, Türkiyə Qəzza zolağında gedən döyüşlərlə bağlı İsrailə qarşı iddiaya qoşulmaq üçün Beynəlxalq Ədalət Məhkəməsinə müraciət edib. Türkiyə, Qəzza zolağındakı hərəkətlərinə, o cümlədən Rəfah şəhərindəki əməliyyata görə İsraildən cavabdehlik tələb edən yeddinci ölkə olub. İddia Cənubi Afrika tərəfindən 2023-cü ilin dekabrında başlayıb. Türkiyə prezidenti Rəcəb Tayyib Ərdoğan anklavda baş verənləri soyqırım adlandırıb. İsrail hakimiyyəti bütün ittihamları rədd edib.

Beynəlxalq Ədalət Məhkəməsi mayın sonunda İsrailə Rəfahdakı hərbi əməliyyatını dayandırmağı və fələstinlilərə qarşı soyqırım xəbərlərini araşdırmaq üçün Qəzza zolağına beynəlxalq müfəttişlər qrupunu göndərməyi əmr edib. Qərarı 15 hakimdən 13-ü dəstəkləyib. Uqanda və İsrail nümayəndələri buna qarşı çıxıblar.

Türkiyə ilə yanaşı, daha əvvəl Cənubi Afrikanın iddiasına Nikaraqua, Kolumbiya, Liviya, Meksika, İspaniya və Fələstin də qoşulmuşdu. Beynəlxalq Ədalət Məhkəməsinin atəşkəs və digər tədbirlər haqqında göstəriş vermək səlahiyyəti var, lakin onun hökmlərə əməl olunmasına nəzarət etmək üçün icraedici aparatı yoxdur.

//Samir Qurbanov, Editor.az