Rusiya Türkiyə, Rusiya, İran və Suriya xarici işlər nazirlərinin görüşünə intensiv şəkildə hazırlaşır və gələn həftə Moskvada bu ölkələrin diplomatik idarələrinin nümayəndələrinin texniki görüşü keçiriləcək.
Editor.az bildirir ki, bu barədə Türkiyənin xarici işlər naziri Mövlud Çavuşoğlu İranlı həmkarı ilə görüşdən sonra Ankarada keçirilən mətbuat konfransında deyib. Onun sözlərinə görə, Rusiya tərəfi gələn həftə xarici işlər nazirlərinin görüşünə hazırlıq xarakteri daşıyacaq texniki görüşün keçirilməsini təklif edib.
Türkiyənin xarici işlər nazirinin müavini, İran Xarici İşlər Nazirliyinin nümayəndələri Moskvaya gələcək və növbəti mərhələdə hamı üçün əlverişli vaxtda xarici işlər nazirlərinin görüşü keçiriləcək.
Xatırladaq ki, dekabrın sonunda Moskvada 11 illik fasilədən sonra Türkiyə və Suriya müdafiə nazirləri arasında Suriya böhranının həlli yolları müzakirə edilən ilk danışıqlar keçirilib.
//Samir Qurbanov, Editor.az